Der Duffesbach, et Wasser vun Kölle

Der Duffesbach
Der Duffesbach
Der Duffesbach, et Wasser vun Kölle… Et fängk jo nit met däm staatse Aquäduk aan, dat de Römer vun der Urftquell heehin gelaht han. Et Ramona hät dat em Beidrag zom Aqäuduk ald richtig verzallt.
 
Drinkwasser es su wichtig, dat et hügg dat Lebensmittel es, dat am mieste kontrolleet weed. Ald de Römer wor genau dat klor. Ich meine, wie der Marcus Vipsanius Agrippa 38/39 vür Chrestus hee aankütt, die Lag richtig god för en Siedlung fingk, gitt et hee vill Vürdeile, nor dat eine nit: ene klore, reine Bach met Wasser, dat mer god drinke kann.
 
Alle Bäch op der linke Sigg vum Rhing versickere noch bevür se en im aankumme. De Römer grave zonöchs Pötze.
Et Uppidum Ubiorum erwies sich tatsächlich als stabile, beständige, wichtige Poste. Em Johr 50 noh Chrestus gevve sich römische Baumeister dran, däm Bach, dä durch die klein Bächelcher vun däm große Feuchgebiet vun der Ville bei Knapsack si Wasser kritt, ze helfe, bes en der Rhing ze fleeße.
 
Se leite der Duffesbach en ene Kanal üvver Hürth, erüvver noh der Luxemburger Stroß, lans die Stroß bes koot hinger et Wießhuus, quer üvver der hüggige Salierring, lans de Stroß „Am Weidenbach“ un am südliche Engk vun der römische Stadtmuur vörbei. Verzäll dat ens enem Germane!
Mer kann jo för dat Vürhan „ich kanaliseere ene Bachlauf“ nit einfach ene Grave en de Landschaff trecke. Et es ald jet diffisiller, fresch Drinkwasser noh Kölle ze schaffe. De Technik hät sich kaum geändert, meine ich. Der Bach läuf domols ald off unger der Ääd.
 
Üvverall finge sich Enstiegsschäch, die de Römer enlooße, för nohm Räächte sinn ze künne. An der Berrenrather Stroß, koot hinger der Zofahrt nohm Geißbockheim, hügg noch ganz en der Nöh vum Duffesbach, dä an dä Stell üvver der Ääd verläuf, fingk mer esugar e Entschlammungsbecke vun de Römer.
Ich gläuv, se hätte sich nit dräume looße, wat noh inne noch all passeet. Em Meddelalder es hä e Politikum. Der Bach selvs weed em Meddelalder en Kölle nit för zo Drinke genötz. De Kölsche drinke widder usem Pötz. Der Duffesbach es zo dä Zigg ene Gewerbebach.
 
De Gerver, Färver, Weber, Filzschohmächer un ganz am Engk de Malzmüll, bruchen en unbedingk.
Drusse vür der Stadt sin ävver Buure, Klüster un Ordensritter, die der Bach för ehr Felder un Mülle beaanspruche. Dat merke de Kölsche luuter tirek. Dann ene Bach, dä avgeleit un opgestaut weed, kütt nit en Kölle aan. Et weed sich ärg dröm gefetz. De Kölsche sage „Hey, ohne uns göv et dä Bach jo gar nit.“, die andere antwoodte „Jo un? Hä flüüß durch uns Land!“.
 
Sugar der Paps Johannes XXII. weed öm en Ordeil gefrog. Jeck, dä mäht et ald 1321 wie de Politik hüggzedags un setz eesch ens en Ungersuchungskommission en. Ergebnis: der Duffesbach gehürt Kölle un de Anrainer vür Kölle dürfe in nor vun Samsdag 15.00 Uhr bes Sonndag 15.00 Uhr nötze.
Ävver wat intresseet dich dinge Chef, wann hä wigg fott es? Em Johr 1560 heiß et für 1000 Kölsche sugar „An de Waffe, op noh Hürth!“. De Inspekteure befreie, die bei der Arbeid gefange genomme woodte. Dä rechliche Explezier, dä dann kütt, trick sich wigg üvver 50 Johr bes en et Johr 1617. Esu vill zo Verwaltungsverfahre. Un dat es nor ei Beispill.
 
Wo dä Name „Duffesbach“ herkütt, es üvvrigens nit klor. Benne un usserhalv vun Kölle sprich mer vum „Bach“ ov de „Bäche“. Vom Woodstamm wör „Tuffmüllbach“ ov „Duvebach“ als Erklärung möglich. Wilde Spekulation, ävver mer hät nix anderes.
Irgendwie finge ich et schad, dat hä an der Kreuzung Berrenrather Stroß / Militärring einfach esu wie immer en der Ääd ungertaucht. Jeden Dag laufe de Sülzer un Klettenberger un de Kölsche us der Neu- un Aldstadt Süd üvver en. Un wedde, de mieste es gar nit klor, wä se do su met Föß tredde. Woher och?
 
Mechel

Hinterlasse jetzt einen Kommentar

Kommentar verfassen

Diese Website verwendet Akismet, um Spam zu reduzieren. Erfahre mehr darüber, wie deine Kommentardaten verarbeitet werden.