Bischöff an der Spetz

Woröm han em Meddelalder de Bischöff et Regalt?

Ich kann jo hee bei Kölschgänger jo nit bes op et i-Pünkelche widdergevve, wat ich su all finge, wann ich en de Böcher luure. Do weed jo söns der Kaffee beim Lese kald. Trotzdäm han ich wochelang üvver de Overstolze jet hee eren gesatz. Die han jo ävver och luuter esu vergnöglich gäge de Ääzbischöff gekämf! Dobei kom mer genau die Frog en der Senn, wieso hee em Meddelalder de Ääzbischöff et Regalt hatte.

Et soch jo nit god för Chreste us

Et es lange Zigg nit leich, ene Bischoff vun Kölle zo sin. De Römer verfolge jo zonöchs Chreste, su och en Kölle. Wie de Chreste sich dann grad met de Römer arrangeere, kumme die durch de Franke unger Drock. Dies Heide do nemme sich Kölle em Johr 355, wie de Römer gezwunge sin, Zaldate usem Militärstötzpunk Kölle noh Rom ze holle. Die sollte beim Ööschel. Dä et do gov, helfe. Als Chress kütt mer zo dä Zigg irgendwie durch, hät ävver nix ze sage.

Besser weed dat eesch, wie der Künning Chlodwig I. sich selvs däufe lööt. Der Künning Chlodwig I. es ene Franke-Künning vum Merowinger-Geschlääch. Die Dauf muss em letzte Johrzehnt vum 5. Johrhundert ov em eeschte vum 6. Johrhundert gewäse sin. Och domet hatte ävver de Bischöff en Kölle nor jet för de Chreste ze sage. An Politik es nit zo denke.

En Käälsfründschaff

Jetz kenne mer jo all der Karl der Große. Dat es dä Franke-Künning, dä die Wend brängk, die för die Maach vun de Ääzbishöff sorg. Ich han ald vür langer Zigg die Sag opgeschrevve, die öm et Krieler Dömche eröm spillt un verzällt, wie et zo dä Fründschaff zwesche dem Karl dem Große un dem Pastur Hildebold kütt, su dat der Hildebold dat „Pössche Ääzbischoff“ kritt. En ech wor dat secher nit esu schön wie en dä Sag:

Wie dat luuter su es, weiß mer och bei bekannte Minsche off nit, wann se gebore sin. Su es dat och beim Bischoff Hildebold. Ävver em Johr 787 weed der Hildebold op Wunsch vum Karl Bischoff vun Kölle. Der Hildebold es jo no och mih wie ene „Fründ“. Hä es der Ääzkaplon vum Karl, op dä hä hürt. Mer kann sage, hä es der Baas vun de fränkische Chreste. Der eeschte Chress em Land.

Zo dä Zigge gitt mer su verdeente Lück Land för se zo entluhne. Der Hildebold soll sing Enkumme us Kölle un däm Land, dat drömeröm litt, trecke. Ävver der Karl der Große deit noch mih. Hä kritt et hin, dat der Paps Kölle zom Ääzbistum mäht. Dat heiß, dat Kölle noch vür de andere Bistümer steiht un der Hildebold vum Rang zwesche dem Paps un de andere Bischöff. För e Beispill darf der Hildebold och selvs Bischöff ernenne. – No jo, es klor, dat et do mih wie eine Aansich gitt, ov dat esu rääch es.

Woröm kritt Kölle dann dat Pössche üvverhaup?

Woröm der Karl Kölle begünstig un nit Ooche, wo hä jo gekrünt woodt, es nit ganz klor. Et heiß, dat hä gesaht han soll, dat Kölle de schönste un florierendste Stadt en singem Rich es. De Fachlück meine, et litt dodran, dat Kölle en römische Colonia wor un domet, wie die Ääzbistümer Trier un Mainz, einfach en ener große Tradition stundt. Am Engk geiht et jo nit öm de Regierung vum Frankerich sondern öm de Römisch-Katholische Kirch.

Un dat brängk Maach?

Zo dä Zigg es en Kölle nit klor, wä kölsche Interesse noh usse hin god vertredde kann. De römische Herrschaff, die klor organiseet wor, es ald lang fott un de Franke wore ihter e Buurevolk wie Stadtlück, die op Handel us sin. Do deit su ene mächtige Kääl, dä et met Kölle god meint, die Stadt fördere un beschötze deit, och ech ens god. Klor, denke de Ääzbischöff och an de eige Nüsele. Denn nor wo Geld verdeent weed, kritt mer als Baas ene gode Verdeens. – Wann do en Koh melke wells, muss do se och op de Weid föhre.

Mer muss doch sage, dat dat dem Hildebold un och singe Nohfolger esu god gelunge es, dat Kölle unger däm Schotz esu rich gewoode es, dat Kölle su üvverhaup eesch erwahße weede un eige Entscheidunge enfordere kunnt. Un deswäge, wann mer üvver uns Ääzbischöff schänge, müsse dat och luuter em Kopp behalde.

Mechel