Unse Stammbaum

– wä vum Agrippa verzällt, muss och der Wäg nohm Agrippina dem Jüngere opzälle, han ich letzte Woch geliert.De „Blodsbröder“ der Augustus un der Agrippa sin et alsu schold, dat de Ubier öm et Johr 19 vür Chrestus (v.Chr.) vum Gebiet op der Schäl Sick, dat esu ungefähr zwesche der Sieg, der Lahn un dem Main log, en et Linksrheinische ömgesiedelt weede. Et neue Gebiet es jetz natörlich nit nor „Kölle“, et es doch ald jet größer: et Ahrtal, Bonn un drömeröm, ävver och Ooche bes nohm räächte Ofer vun der Wurm, die sich vun Ooche bes Heinsberg schlängelt und dann jet nördlich vun Kempen ene Fisternöll met der Rur hät. Tja, un dann es do evvens hee et kölsche Gebiet. Et Oppidum Ubiorum weed vun de Römer als ubische Hauptoot bestemmp. De Römer schötze vür allem dä Oot. Ävver och de Ubier sin en de Flich genomme, ehr Oppidum Ubiorum ze schötze.

Der Agrippa, dä dat all en de Gäng Laufe brängk, hät ävver och e Privatlevve. Met singem Julia, der Doochter vun singem beste Fründ dem Kaiser Augustus – hatt ich jo letzte Woch geschrevve – hät hä en Doochter, et Agrippina et Äldere. Et weed em Johr 16 v. Chr. gebore. Singe Papp, der Agrippa, stirv wie et eesch zwei Johr ald es.

Et Julia, de Mutter, hierod donoh der Tiberius. Der Tiberius es ene adoptierte Sonn vum Kaiser Augustus – et bliev alsu alles en der Famillich – un hä folg im em Johr 14 noh Chrestus (n.Chr.) op der Thron. Et Agrippina wähß am Hoff vum Augustus op un hät wall och e god Verhäldnis zo im. Su hät et luuter Kontak met der römischen Elite.

Der Augustus es et och, dä doför sorg, dat et Agrippina et Äldere der nächste Aanwärter op der Thron hierod: singe Großneffe der Germanicus. Der Germanicus, met ganzem Name Nero Claudius Germanicus, es Oberbefählshaber vun de römische Truppe am Rhing. Su kütt et, dat et Agrippina de Äldere sich em Johr 16 grad hee em Oppidum Ubiorum ophäld un dobei de gemeinsame Doochter Agrippina de Jüngere op de Welt brängk. Ald allein dä gewöhnliche Satz hät dobei su vill spannende Historie un Histörcher es sich, dat dat hee total der Rahme sprenge dät…

Et Agrippina die Jüngere, es dat, noh däm am Engk uns Kölle – CCAA – Colonia Claudia Ara Agrippinensium – benannt es. Wie kumme mer no zor Ihr, vun enem ubische Haupdörp zor Sicherung vun der Grenz zo ener ech römische Kolonie ze weede?

För sing Maach och de verbündete Völker för Auge ze föhre, setz et Agrippina durch, dat em Haupoot vun de Ubier, wo et gebore woodt, en Veteranekolonie aangelaht woodt, die noh im benannt woodt“, schriev der Tacitus öm 50 n. Chr.. Maachdemonstration? Extra en Aansiedlung och vun römische Veterane? Selvsverständlich!

Jo, et Agrippina es, sage mer, maachbewoss. Nüsele recke ehr nit. Et hierod selvsverständlich och en de Elite vum römische Adel en. Singe eeschte Kääl es em Johr 28, dämnoh met 12 Johre, der Gnaeus Domitius Ahenobarbus, ene Großneffe vum Augustus. Met däm kritt et em Johr 37, met 21 Johr, sing einzig Ströppche, der Lucius Domitius. Ävver singe Kääl stirv em Johr 40 an en Krankheit. Singe zweite Kääl, der Gaius Sallustius Crispus Passienius, stirv noh sibbe Johre Ih met im. Geröchte sage, et Agrippina selvs hät do jet „geholfe“.

Irgendwie moot dä ävver och ech fott: Der Nächste es em Johr 49 singe eige Ühm, der Claudius. Hä es zo dä Zigg zick aach Johr Kaiser vum römische Rich. Wat för en Maachgewenn! Klor, dat der Gaius Sallustius Crispus Passienius do em Wäg gewäse wör.

Un wann mer jetz noch mih well, wat es do besser? Es et besser en enem ubische Dörp gebore ze sin ov en ener richtige Kolonie vun Rom? Dat schreit noh ener klein Berichtigung för uns ubisch Dörp.
Ald em Johr 50 sin mir hee ene richtige Colonia! Un wesst ehr wat? „Uns“ Agrippina woodt op däm Wäg et eeschte römische „Augusta“ – Kaiserin. Singe Sonn Lucius Domitius begähnt uns och widder: em Johr 54, tirek nohm Claudius, dä för singe Agrippina die Colonia am Ara – dem Offerplatz vun de Agrippinenser – gründt wooden es, weed hä Kaiser. Der Lucius Domitius nennt sich Nero – Kaiser Nero. Un irgendwie fing ich et god, dat hä en Rom geblevve es. Woröm? No, luurt ens op dat Beld.

Geiht et Üch jetz och jet „komisch“? Hat Ehr och dat dunkle Geföhl, dat die vun uns esu verihrte Namensgeberin eigentlich winnig met Kölle em Senn hatt? Es uns Kölle üvverhaup wichtig gewäse? Oder sin mer en Wirklichkeit nor e Nevveproduk vun däm Klüngel, dä en Rom en Gang es?

Egal, meine ich, dä Oot hee, uns Kölle, woodt durch dat Kreppche för immer verändert. Mer mag et en „Schangs“ nenne. Am Engk ävver es Kölle, wat mir drus maache.

Mechel