Wat hät dä Habeck, dä Baas vun de Gröne, om Parteidag gesaht? „Maach, dat es en unsem Kosmos off en Bah-gangk-mer-fott-domet-Begreff, ävver ‚Maach‘ kütt jo vun ‚maache‘.“. Hät hä jo fröh erkannt, dä Habeck. Ene Kölsche woss dat vür 800 Johr ald. Hä wor am Maache, domet hä Maach kräg un wor der Kopp vun ener beröhmte Famillich: de Overstolze. Alsu, bei denne weiß ich nie, woröm mer uns en der Flimmerkiss de „Tudors“ ov „Medici“ aanlure, wo mer doch en Kölle locker methalde künne un bovvendren die Nohkumme och noch uns Nohbere sin.
Der Mattes Overstolz
Der Mattes Overstolz hät ävver och vill zo verliere gehat: de Overstolze sin, wie der Mattes Overstolz vermodlich esu öm 1215 eröm gebore weed, villleich et vürnähmste Geschlääch vun dä steinriche Patrizierfamillie, die met de Ääzbischöff em 13. Johrhundet öm de Maach en Kölle ringe. Der Mattes Overstolz, dat es beläg, wor en alle Intrige un Kämf gäge de Ääzbischöff beteilig. Ävver ging et dem Mattes öm Kölle ov öm dat Vermöge, dat perdu gegange wör, wann hä verlore hätt?
Woröm heiß dat „Geschlääch“ un nit „Famillich“?
Wie dä kleine Mattes op de Welt kütt, es singe Besteva, dä als Stammvatter vun däm Geschlääch gild, grad drei Johr dud. Dat wor der Gottschalk Overstolz. Hä wor ene Gewandschnieder, dä durch en kloge Hierod esuwie sing Hängche för et Immobiliegeschäff un der Handel, rich gewoode es. Hä allein hatt aach Pänz, die vun im erve un die aach Sträng wiggerführe, esu dat en Großfamillich en Kölle entsteiht.
Hüggzedags dät mer villleich „Clan“ sage. Dat schaff en Kölle nor ene kleine Rötsch Famillie. Ich meine, dat rich un vill sin. Un evvens för die säht mer met der Zigg dann „Geschlääch“. Dat sin jo eigentlich ganze Püngele vun Famillie, die mer op ein Päärche zoröckverfolge künnt, wann mer der Üvverbleck behalde künnt.
Un all wolle se Maach han
Haupsächlich welle de Geschläächter vür allem rich blieve un doför bruche se Maach. Maach kritt mer durch Pakte. Esu kütt et en Kölle zo enem große Zosammeschluss, der Richerzeche, die sich ungereinen hilf. Die eigentliche Maach üvver Kölle hät zo dä Zigg ävver der Ääzbischoff, dä se üvver Schöffe usübe lööt. Die Schöffe weede vum Ääzbischoff us der kölsche Bürgerschaff berofe.
Se spreche Rääch un han och de städtische Verwaltung unger sich. Wann mer sich jetz esu verhäld, dat der Ääzbischoff Lück us der Richerzeche zo Schöffe beröf, kann mer och do Maach usübe. Un genau dat passeet. Bürger us der Richerzeche halde baal die Hälvde vun de Schöffesetz un ringe dem Ääzbischoff av, dat de Richerzeche Maach en der Enneverwaltung usübe kann. För e Beispill han die flöck de Kontroll üvver de Määt en Kölle – un se welle mih. Se belde et Patriziat, se sin Patrizier.
En lästige Feindschaff
Wann mer jetz an einem Strang trecke däte, wör et jo leichter, däm Ääzbischoff Maach zo nemme un sich selvs zo gevve. Ävver sujet es jo Wunschdenke. Wohr es, dat die Geschläächter vun de Overstolze un vun de Weise sich nit ligge künne. Ich mööch vun Feindschaff spreche. Wie dat gekumme es, ich kann et nor rode. De Overstolze gelde zo dä Zigg als et richste Geschlääch un Richdum bedügg Enfloss. Nor die Weise stelle ze baschte Schöffe. Jetz nemmen ich aan, dat de Overstolze mih met andere Patrizier geklüngelt han un de Weise sich vun Aanfang an mih mem Ääzbischoff verdrage han, domet se Enfloss krähte. Dat dat knalle moot, es klor.
Der Ääzbischoff versök et…
… mer kann sage „immer un immer widder“. 1252 lööt dä Ääzbischoff Konrad von Hochstaden Münze schlage, die nit mih dat wäät sin, wat drop steiht. En Handelsstadt wie Kölle kann sich dat nit beetd looße. Dä Strigg eskaleet esu ärg, dat der Konrad von Hochstaden die Stadt vum Rhing us met Brandfackele beschüüß. Dä „kleine Schied“ schaff koot Fridde. Der Ääzbischoff muss ävver op e paar Stüüre verzichte un weed beim Präge vun Münze vun de Kölsche kontrolleet. Vürre op der Sigg vun der Stadt met dobei: der Mattes Overstolz.
1257 hät der Ääzbischoff sich erhollt un sök ald widder Strigg. Hä es wäge ener Ööschelei vür singem Palass en der Stadt beleidig! Et Kamffeld litt dismol en Freche. Kölsche Zaldate verkloppe de kurkölnische Zaldate vum Ääzbischoff. Der Mattes Overstolz, widder vürre met dobei, mäht ene Fähler: Wie die Kurkölnische ald geschlage sin, jöck hä su flöck, dat hä zo wigg nohsetz un gefange genomme weed. En der Godesburg sitz hä en der Blech, kann ävver baal avhaue. Der „große Schied“ em Juli 1258 deit eigentlich nix anderes, wie dat bestätige, wat es: der Ääzbischoff hät de Maach üvver Kölle, soll ävver der Verwaltung em Ennere nit erenschwaade. De Zoständigkeite weede quasi klorgestallt.
De Bürger vun Kölle sin ävver och met der Herrschaff vun de Patrizier em Ennere nit glöcklich, wat der Konrad von Hochstaden em Geklüngels gewetz usnötz. Am Engk vun däm Gedöns steiht 1259, dat de Patrizier – un zo allereesch der Mattes Overstolz – die Ämter verleere, die se aangehäuf han.
Dä Zostand duurt ävver nor koot. 1261 kütt der Konrad von Hochstaden öm et Levve un der Engelbert II. vun Falkeburg üvvernimmp. Dä Aanfänger lööt sich em Johr drop en der Schlaach öm der Bayeturm fottjage, en dä die Kölsche et eeschte Mol „Kölle Alaaf“ rofe… Natörlich hollt der Mattes Overstolz sich met singe Fründe die Ämter widder.
Em Johr 1265 belagert der Engelbert II. Kölle, muss ävver noh drücksehn Dage avbreche, weil singem Verbündete, däm Graf vun Cleve, de kölsche Schotzhellige erschunge sin un in der Mod verlooße hät. Do hät sugar ene Bischoff kein Chance, wann Hellige em Spill sin. Ich meine nor, mer weiß doch, bevür mer gäge Kölle trick, dat mer hee Schotzhellige han? Kann et sin, dat der Schotzhellige der Mattes Overstolz wor un singe Helligesching e Säckche Geld? Vürsich, dozo gitt et keine Beläg, ich denke nor laut.
En halv Johrhundert Kamf fingk en Engk
Koot donoh prügelt der Mattes Overstolz met singe Fründe, dä Patrizierfamillie, die zo im halde, de Weise blodig us der Stadt. De Weise flüchte noh Bonn, wo se sich mem Engelbert II. verbünde un met mih wie 5000 Kämfer widder op Kölle trecke. Die beröhmte Schlaach öm de Üülepooz, die ich ald beschrevve han, fingk hee en der Naach vum 14. op der 15. Oktober 1268 statt. Ganz vürre met dobei – Ehr wesst dat ald: der Mattes Overstolz, villleich öm 53 Johr ald.
Tirek beim eeschte Aangreff weed hä schwer verwundt un weiß, dat hä sterve muss. En däm Momang reech hä si Wood an die Kölsche, die noch zögere, de Overstolze zo helfe: Hee geiht et jetz öm Kölle. Bliev Kölle frei ov deene mir Kölsche dem Ääzbischoff, dä grad sing eige Stadt plündere well? Dat wirk, och bei singem Sonn: der Gerhard Overstolz schnapp sich sing Ax un jöck durch die Reihe vum Feind…
Mechel
Hinterlasse jetzt einen Kommentar