„Space Invaders“ – hee levve Usserirdische medden unger uns! Wie ich die Dag e Gängelche maache, fällt minge Bleck op e Mosaik. Ich blieve stonn un üvverläge, woröm mir dat Motiv bekannt vürkütt. Ich stiere fass ald en Minutt, wie mi Altargeschenk mich frög, wat dann loss es. – Op Wäng glotze ich jo miets nit esu lang. – Ich zeige op dat Mosaik un sage „Space Invaders. Weiß Do noch dat Spill vun domols?!“.
Ja jo kennt dat dat: „Jo, ich wollt dat luuter op der Kirmes spille un hatt nie de Grosche doför. Un do häs rääch, dat es ene Space Invader.“„Space Invaders“ es e Computerspill, dat ich vun der Atari-Konsol kenne. Unge hät mer en klein Kanon, die mer noh links un rähts bewäge kann un dobei ballere. Dat es och brudnüdig, weil vun bovve de Usserirdische en Welle aankumme. Sollte die unge op der Ääd aankumme, es dat Spill am Engk. – Gewenne kann mer nie, weil die Aliens irgendwann esu flöck un vill sin, dat se luuter durchkumme.
Klingk jeck? 1978 woodte de 100-Yen-Münze esu knapp wie et Klopapier bei uns dis Johr em Määz, weil de Japaner all ehr Nüsele en die Automate gestoche han. Dat es jeck! Un einer, dä hät bes hügg et Schoss erus, weil hä dat zo vill gespillt hät. Dat Spill hät in nit mih loss gelooße. Bestemmp, weil hä genau wie ich luuter verlore un dovun e Trauma kräge hät. Hä nennt sich och ald „Invader“ un es ene Künstler us Frankreich. Zoeesch hät hä en Pariss su Mosaike an de Wäng gekläv. Dann kom im en der Senn, dat mer su jet jo en ganz Frankreich dun künnt. Donoh woodt im och Frankreich zo klein un hä wor en ganz Europa ungerwähs – un donoh en der Welt.
En Visby un en Perth, en Mombasa, Hongkong, New York un Bhutan hänge die Dinger – un evvens och hee en Kölle. Der Invader versök wall 20 bes 50 Mosaike en jeder Stadt aanzebränge. Wann hä dat nit op eimol schaff un hä widderkumme muss, nennt hä dat en „Well“. Hee en Kölle wor hä dreimol. Mer woodte dämnoh en drei Welle vun Usserirdische heimgesök. Insgesamp hät hä hee 27 Mosaike aangebraht. Hä säht, dat hä sich genau üvverläg, wo die hinkumme. Et solle Pläätz sin, wo richtig jet loss es, wo et „urbane Levve“ spillt, domet de Usserirdische och meddemang unger uns sin. Ich selvs han jo ihter dä Verdaach, dat hä gään och jet met der Jugend fiert.
Die Mosaike kenne ich vür allem vun der Eck öm de Freesestroß, öm der Dom eröm, vum Südbahnhoff an der Zülpicher Stroß un öm de Ihrestroß eröm. Die Deile mag nit jeder. Däm Invader es dat egal, hä frög nit un deit et einfach – wie die Aliens em Spill. Deswäge kütt av un an e Mosaik widder fott un en e paar Länder darf hä och nit mih kumme, weil se do üvverhaup gar nit wolle, dat hä „Space Invaders“ irgendwo draanpapp. Och hee en Kölle hät hä die ein ov ander Stell getroffe, die ich nit esu god finge. För e Beispill kläv eine Invader tirek üvver der Gedenktafel vum Tina, dat an dä Stell 2002 unger ene Wage vum Rusemondagszog gekumme es. För mich – un nit nor för mich – es dat ene Oot, för koot enzehalde.
Am Engk muss ich ävver och sage, dat ich die Dinger mag. Se erennere mich an ming Jugend un ich muss griemele, wann ich daran denke, dat irgendwo op der Welt ene andere Minsch us ener andere Kultur och op genau su ene „Space Invader“ luurt. Irgendwie verbinge die uns, weil all en mingem Alder genau dat Spill gespillt han.Insgesamp han ich 13 vun de 27 Beldcher gefunge. Luurt nor op die Fottos. Wä weiß, wo noch eins hängk? Krige mer all die 27 vun Kölle zosamme? Mechel
Hinterlasse jetzt einen Kommentar