Gremberger Bösch

Stellt Ehr Üch metzigge och su ungerbewuss die Frog, wä wall der deckste, dönnste, schönste, größte ov wat weiß ich för e Extrem es? Ich jo.

Minge eeschte Beidrag hee ging üvver et Ubiermonument. Dat es der fröheste Steinbau vun Kölle, wann nit sugar nördlich vun de Alpe. Wann Ehr gaanz wigg met der Muus noh unge rötscht, weed Ehr in finge, ov evvens op unser Sigg: http://www.koelschgaenger.net

Ich han mer av un aan die Frog gestellt, wä wall de äldste Kölsche sin. Alsu Wese, die jetz hee met uns zosamme levve. Zoeesch daach ich, ich dät se em Zolonische Gade finge, ävver mer woodt flöck klor, dat et iher kei Dierche sin kann.

Dat wör zo leich. Su en Information fingk mer en der Zeidung.
Letzlich han ich et nit selvs erusgekräge, villmih ben ich üvver die Information ihter zofällig em Boch vum Bärbel un dem Chrestoph Driessen „Köln – eine Geschichte“ (ISBN 978-3-7743-0653-0): gestolpert: de Boche vum Gremberger Wäldche sin üvver 250 Johr ald. Dä! Wä hätt dat gedaach!

Em besahte Boch steiht geschrevve, dat en däm Gebiet vür dem Johr 1870 kaum Minsche lävte – zwanzig an der Zahl, em Gremberger Hoff. Eesch 1880 kom e preußisch Fort dobei, dat bei der Festungsgöödel gehürt. 1899 käuf de Stadt Kölle dä Wald, öm e Naherholungsgebiet ze schaffe.
Natörlich muss ich dohin – av op et Räddche. Dat es ävver och verstoche! Em Weste de Gleise vun der Bahn, die et Rangierwerk en Gremberg un dat en Kalk ungerein verbinge, em Oste de Bahntrass för der Personeverkehr, die tirek op Düx zohäld. Beidse krütze sich em Norde. Un em Süde verläuf quer de A4. Un wie wenn dat nit genog es, han mer medden durch dö kleine Bösch noch de Össliche Zobringerstroß gebaut. Engekesselt un durchstoche! Üvveral hürt mer et Ruusche vum Verkehr.

Ich gläuve, dat es dat Geheimnis, woröm mer dat Wäldche en Rauh lööt: för Hüüscher es et hee zo ungemödlich. Un doch, irgendwie behödt kütt mer sich ungerm deechte Blädderdaach vür. Hetz un Schmuddel weede avgehalde. En klein grön Lung, medden em tosende Verkehr. Un wie ich su höösch durchradele, stellt sich mer die ein Frog: wä es jetz der äldeste vun dä Kamerade? Ich finge et nit erus.

Egal, ich kumme widder un wääde noch ens söke. Wä weiß, wodrüvver ich dann stolpere.

Mechel