Letzte Woch kom die Frog op, woher mer dat üvverhaup all wesse, wat mer hee schrieve. Natörlich, weil Minsche all dat opgeschrevve han. Donoh han widder andere Minsche die Schreffstöck zosammegedrage, gelese, et Wichtigste vun däm, wat do geschrevve steiht, zosammegeknuuv un widder opgeschrevve, dismol en Böcher. Un die Böcher lese mir jetz. – Ävver am Aanfang wor luuter ene Minsch, dä nit wollt, dat dat wat hä weiß, met im stirv. Bei de Overstolze för e Beispill, wor dat der Werner Overstolz.
Wä wor der Werner Overstolz?
Der Werner Overstolz lävte em 15. Johrhundert vun 1416 bes 1493. Hä stundt fass am Engk vun ener Reih vun bekannte Vürfahre us der Rhinggass, üvver die ich de letzte drei Woche verzallt han. Och wann hä zick 1444 Ritter vum Deutsche Orde wor, wor et Aansinn un et Enkumme vun dä Famillich längs nit mih dat wie hundertfuffzig Johr dovür. De Zigge wore andere gewoode. De Patrizierfamillie, de Geschläächter, hatte nit mih dä Enfloss, wie zo dä Zigge, en dä en Mattes ov en Gerhard Overstolz geläv han. 1396 wore jo de Gaffele an et Regalt gekumme – besser: de Gaffele han et sich genomme.
Woröm schriev hä e Famillijeboch?
En Kölle bekannt es der Werner Overstolz vür allem, weil hä av 1444 e Famillieboch geschrevve hät. Us däm Boch trecke mer hügg ene Deil vun dä Erkenntnisse, us denne mer uns e Beld vun dä Zigg maache. Ich gläuve nit, dat hä 1444 ald woss, dat die Linie vun männliche Overstolze us der Rhinggass met singe Sönn usstirv. Dat kunnt hä, wie hä aanfing zo schrieve, noch nit wesse. Ävver hä woss nor zo genau, mer kann och sage, hä moot erdrage, dat de Maach nit mih de Patrizier vun Kölle gehürte. De Gaffele hatte jetz jet so sage. Dat wor keine ärge Knies – enä, dä Kamf wor verlore, der Glanz vun singer Famillich wor perdu. Un an wä? An die Lück, die noch nie groß jet ze sage hatte, ordinäre Bürger. Die, die met ehre Häng Geld verdeene moote un met ehre Häng die große Tradion einfach su kapodd gemaht hatte.
Tradition mäht der Ungerscheed!
De Tradition, die lang Reih vun Vürfahre, die mööch hä singer Famillich hingerlooße. Hä schriev hoorklein op, wo all de Overstolze begrave sin, wat die Famillich de Stifte en Kölle all för e Vermöge vermaht hät un noch vill mih. Wie wih im dat gedon han muss, beläg för mich, dat hä der Stammbaum nit nor bes nohm Gottfried Overstolz zoröckföht. – Der Gottfried wor jo dä Gewandschnieder, dä em 12. Johrhundert met Aki si Geschäff gefoht un gewetz gehierodt hät. Hä gild hügg noch als Gründer vun dam Geschlääch. – Enä, der Werner Overstolz besennt sich op die aale Sage, en dä 15 römische Famillie vum Kaiser Trajan en et Rheinland gescheck woode sin, öm hee de Colonia Claudia Ara Agrippinensium zo gründe – uns Kölle. Hä foht de Blodlinnich bes op en römische Famillich zo dä Zigg vum Kaiser Trajan zoröck!
Der Trajan? Woröm jetz dä?
Wann mer sich ald en ener große Tradition süht, es der Kaiser Trajan gescheck gewählt. Hä wor vum Johr 98 bes zom Johr 117 Kaiser en Rom. Unger im wor Rom am größte. Dat betriff jetz vür allem de räumliche Usdehnung. Ävver der Trajan goldt och als gerääch un weise – ene Patriarch, dä wie ene Papp üvver sing Volk gewaach hät. Et es doch ene Trus, wann mer zeige kann, dat de eige Famillich vun su enem Kääl der Opdrag kräge hät, Kultur en et Rheinland zo bränge. Un kann mer nit och dat, wat grad der Mattes un der Gerhard Overstolz vollbraht han, genau en däm Leech sinn? Es die Tradition nit ene Trus för die, die nohm Werner Overstolz villleich noch kumme?
Sin mer nit all e bessche „Overstolz“?
De Geschläächter, de Overstolzens, ävver och de Aduchts, de Bircklins, de Grins, de Gyrs, de Hardevusts, de Hirtzelins, de von Horns, de Judes, de Kleingedanks, de Lyskirchens, de Quattermarts, de Scherfgins un de vun Spiegels sin doch nit fottgetrocke. De Nohkumme levve doch noch hee unger uns un sin üvver de Johrhunderte secher nit unger sich geblevve. Kann mer hee en Kölle gebore sin, ohne dat jet vom Blod ov zomindes jet vum Stolz vun dä Famillie, vun dä kölsche Tradition en Dir un mir stich? Hät uns der Werner Overstolz met däm Boch nit och verklört, dat Do un ich, mir all nor deswäge hee sin, weil der Kaiser Trajan dat esu han wollt? Mer gefällt dä Gedanke.
Mechel
Hinterlasse jetzt einen Kommentar