Jetz han ich ald zweimol üvver Minsche vum Geschlääch vun de Overstolze geschrevve. Nor, wo han die dann gewonnt? Jetz künnt ich einfach „no em Overstolzehuus“ sage. Dat steiht jo ald luuter noch en der Rhinggass Nummer 8. Han se och. Ävver dat es nor dä eine Deil.
Wat mer üvver dat „wo“ wesse
Wie ich üvver der Mattes Overstolz geschrevve han, han ich jo koot explizeet, dat dä Overstolz, op dä mer dat Geschlääch zorockföhre kann, dä Gewandschnieder Gottschalk Overstolz wor. Hä hät vun 1145 bes 1212 geläv. Zo dä Zigg hät hä noch en „Oversburg“ gewonnt, wat ene Deil vun der Vürstadt em Meddelalder wor. Dat Terrain log öm Zint Maria Lyskirchen eröm un trok sich bes noh der „Kleine Witschgass“. Der Gottschalk Overstolz hät ävver aach Pänz gehat. Es klor, dat die sich üvver de Stadt verdeilt han un mer dat „Wo“ gar nit mih su genau zeige kann. Zwei Sönn vun im kaufte för e Beispill der Hoff „Zederewald“ un baute do sechssehn Hüüser – die Stroß heiß hügg „Unter Sachsenhausen“.
Haupsetz vun der Famillich
Et Blithildis Overstolz ävver, en Doochter vum Gottschalk Overstolz, hät der Ritter Werner vun Schuren gehierodt. Dä Name „Overstolz“ hät zo dä Zigg ald besser geklunge wie „vun Schuren“. Dat soll heiße, dat dä Name en der kölsche Gesellschaff mih wäät wor. Deswäge heeß der Werner noh der Huhzigg och „Overstolz“. Nor dat Huus, dat beids esu av 1220 en de Hüh troke, heeß deswäge lange Zigg „Haus zur Scheuren“. 1230 trok die Famillich do en. Wat heiß „die Famillich“? Et wor der Haupsetz vun däm Geschlääch un eigentlich gehürte, mer kann sagen, de Stroßezög vun der Rhinggass un vum Filzegrave dobei. Dat weiß mer hügg nit mih esu, weil die Grundstöcke durch et Verdeile an vill Erve luuter kleiner woodte.
Et Gebäude
Genau wie dat grad jetz widder en Mode kütt, däte de Overstolze ald dozomol doheim arbeide un wonne. Em Parterre wore Wonnung un ene Raum, för Gäss zo emfange. Wenn et jet größer weede sollt, wor en der eeschte Etage ene große Fesssaal. Dat es do, wo em Beld hinger der Glasfront et Leech brennt. Die vier Etage dodrüvver wore Warelager. De Overstolze hatte vier Etage em eige Huus nor för War…. Mer han en Kölle üvvrigens nor dat eine Beispiel wie riche Lück em Meddelalder em Stil vun der Spädromanik gebaut han. Die Fassade met de Stuvegivvel un der finge Gelidderung, finge en Kölle nor hee. Andere Baute en däm Stil sin Sakralbaute.
Un wä hät do nohm Blithildis gewonnt?
Der Son Jan erv dä Bau vun singe Eldere un gitt et en der Famillich wigger. An wä genau, weiß mer nit, weil die Schreinsböcher nit gefläg woodte. Eesch 1337 fingk sich, dat et Patriziergeschlääch „Hardefust“ et käuf un do läv. Dat dun die ävver och nor e Johrhundert. En der Folgezigg wähßelt et de Besetzer öfter un wie et 1838 avgerisse weede soll, käuf de Stadt Kölle et flöck. Die renoveet dä Bau un de „Industrie un Handelskammer“ esuwie die Börse vun Kölle trecke en. Nohm Zweite Weltkreeg stellt die Stadt et och widder op. Meede deit et no de „Kunshuhschull för Medie“. -Wann mer usem Stubbearres erus sin, künne mer luure gonn un versöke uns vürzestelle, wie die Pratizier hee geläv han…
Mechel
Hinterlasse jetzt einen Kommentar