Hansa-Hochhaus

De Mamm weed 75 – op, nohm Famillie-Brunch em Osman30. Schön Idee vun ehr! Der Brunch es för minge Geschmack ech god. Ävver ich selvs ben tatsächlich ens nit nor am Esse intersseet. Dat Restaurant befingk sich immerhin en der 30. Etage vum Köln-Turm em Media-Park. Dä Üvverbleck üvver ganz Kölle, dä mer op der staatse Terrass en aller Rauh geneeße kann, wie evvens die usgedehnte Völlerei, es sagehaff!

Ich stonn alsu op der Terrass un luure üvver der Media-Park fott noh Nordweste, wie ich ene Sehnsuchsoot vun minger Jugend widder entdecke: et Hansahuhhuus.

Benannt es et noh singer Lag om Grundstöck vum Hansahoff. Dat Baugrundstöck heiß schlich esu, weil et am Hansaring litt, dä mer, wie hä gebaut woodt, esu genannt hät, weil mer et Geweech vun der Hanse för Kölle ungerstriche wollt.

Et Hansahuhhuus kann mer jo em Hüüsermeer kaum noch usmaache. Ävver wosst ehr, dat dat Huus zwei Rekorde gehalde hät?

Dä Bau weed en de Johre 1924 un 1925 en ener Bauzigg vun 15 Mond gebaut. Staatse Hüüser han en Kölle jo gään ens ehr Baupause, wie Ehr wesst. Die 135 Arbeidsdage, die mer für de Fäädigstellung vun däm doch ech große Bau bruch, finge ich nämlich noch beendrockender.

Möglich es dat, weil dä Architek, der Jacob Koerfer, en neu Technik us Amerika üvvernimmp. Ehr kennt doch all dat Beld, wo de Baulück frei am Schwevve, huh en der Luff op enem Stahldräger setze un fröhstöcke. Genausu es et hee. Zoeesch weed e Stahlskelett huhgetrocke. Nevven dä typisch kölschen Ungerbrechung, muss mer sage, dat mer en Kölle tatsächlich och ens effektiv gebaut han. Mer sin flöcker, wie de Amerikaner zo dä Zigg jet baue, dat mer vergliche kann.

Dä Stahlbeton vun däm Bau weed vun Backsteinklinkere verhüllt, wat dä fremde Bauwies e typisch deutsch Ussinn gitt. Dä Bau es em expressionistische Stil gehalde, dä fass nor en Deutschland aangewandt weed. Miestens sin et Backsteinbaute, die ärg plastisch wirke un domols mem Stil vun der „Neuen Sachlichkeit“ konkerreete. Der Ungerscheed litt en de ihter verspillte Spetz- un Rundböge, die mer em ungeren Deil vum Haupbau noch erkennt. Fröher, vürm Zweite Weltkreeg wor de Fassad zodäm noch met Dier- un Minscheköppe geschmück un fünf schmale Figure stellte die fünf Kontinente dar. Dat stelle ich mer ärg interessant vür. Schad, dat se nit widder hergestallt woodt.

En däm Bau läuf hügg noch ene Paternoster, dä ävver, wann ich rääch Bescheid weiß, nor Gerwerbekunde notze dürfe, die sich em Huus av der aachte Etage engemeedt han. De Zogäng nohm Hotel Azimut vum Paternoster us, dat sich en der eeschte bes sechste Etage befingk, sin durch Glasdürre verschlosse. Ich ben noch nie mem Paternoster gefahre. Wie geiht dat dann jetz, wann mer bovve es?

Der zweit Rekord es: mer hatte mem Hanshuhhuus, dat 65 Meter huh es, för koote Zigg et hühste Huhhuus en Europa hee en Kölle.

Woröm dat jetz ävver ene Sehnsuchsoot vun minger Jugend es? No, weil em Johr 1961 et Anni un der Fritz Waffenschmidt de Firma Saturn Elektro-Handelsgesellschaft GmbH & Co. KG gegründt han. 1977 troke se en et Parterre vum Bau en un sin bes hügg nit mih usgetrocke. Un weil ich ald domols zemlich vill Täschegeld dohin gedrage han, wann ich kunnt, un weil glich en ganze Rötsch hee „Ich doch och!“ kommenteere weed, es de Firma Saturn hügg esu groß. Esu es dat.

Mechel