En Quotefrau?
Et Fygen Lutzenkirchen – et steiht do bovve an der Osssigg vum eeschte Stock vum Rodhuusturm. Et soll för die Fraulück stonn, die en der Männerwelt em Meddelalder wirtschaftliche Erfolg han. Tja, wann ich nohschlonn, stüsse ich op luuter deselve Erläuterunge, die flöck un met voll Wööd op de Stellung vun singem Tuppes kumme… -Doch en Quotefrau, weil et grad Mode es?
Et Fygen Lutzenkirchen es en gebore Bellinghoven. Wann et gebore es, wesse mer nit esu genau. Mer nemme ävver aan, dat et öm et Johr 1450 wor. Der Name Lutzenkirchen nimmp et aan, wie et singe Pitter hierod.
Der Großhändler Pitter Lutzenkirchen
Der Pitter Lutzenkirchen es en der zweite Hälvde vum 15. Johrhundert ene Großhändler en Kölle. Hä käuf Safran en Zargoza en Spanie un zor gliche Zigg Rühsigg en Ravensburg. Hä kütt zo Geld un Enfloss. „Handel“ es villleich jet ungerdrevve. Hä lenk Wareström. Et Aansinn vun de Kölsche Kauflück hilf im natörlich. Hä hät beste Beziehunge noh Flandere en große Handelsstädt wie Brügge un Antwerpe un noh Holland.
Kölsche Kauflück livvere Qualitätswar, dat weiß mer üvverall un mer kann sich drop verlooße. De Kauflück aachte och ärg drop, dat de Qualität stemmp. Wie för e Beispill 1474 dä Kölsche Kaufmann Jan Westphelinck en Bergen en Holland Sigg offereet, die Tinnef es, mokiere sich nit de Lück us Bergen, weil se die jo och belliger enkaufe künne. Nä, de Kölsche Kauflück, unger inne och der Pitter Lutzenkirchen, looße im der Prozess maache un sorge doför, dat dä zoeesch ens (Ware-) Verkehr getrocke weed.
Eng verbunge es der Kölsche Handel och met der Stadt Frankfurt, en dä große Handelsmesse stattfinge.
De Konkurrenz
Dat all es mih wie wichtig för die große Handelsgesellschafte usem Süde, wie de Große Ravensburger ov de Vöhlin-Welser-Gesellschaff. Sie wesse, der Pitter Lutzenkirchen e Hängche doför hät, die Ware usem Süddeutsche üvver Frankfurt un Kölle noh Flandere zo dirigeere un bruchen en. E riesig Geschäff met Linge, Woll, Damass, Samp, Safran, Purpur, un Gewööze usem Morgeland, Rohsigg – e komplizeet Netzwerk. Der Pitter Lutzenkirchen brängk et zum Rodshäär vun der Gaffel „Wollenhaupt“. Se es die vürnehmste vun all de Kölsche Gaffele, de Gaffel vun de Wollweber.
Et Fygen kann et ävver och
Et Fygen Lutzenkirchen weed 1474 Meisterin em Siggmaacherhandwerk. En dä vun Mannslück domineete Welt gitt et en Kölle un söns üvverhaup nor noch en Pariss Zünf, en dä Fraulück et Regalt han. De Siggemaacherinne un de Garnmaacherinne gehüre dobei. Bes 1497 beld et Fygen Lutzenkirchen 25 Fraulück zo Siggemaacherinne us. Sing eige Dööchter, et Lisbeth un et Nies ävver nit. Die maache ehr Lihr bei der Konkerrenz.
Natörlich kann et durch singe Tuppes belliger an Rühsigg kumme. Handelt dä doch en masse domet un Kölle hät et Monopol en der Herstellung vun Siggegewebe. Wann mer nitsch es, kann mer sage, dat hä it produzeere lööt, vekäuf hä doch die fäädige Sigg am Engk met großem Gewenn. Ävver et es ene gewetzte Frau, die mih kann wie wevve. Et weed en der Vörsetz vum Siggeamp gewählt, en däm et sich mih wie 20 Johrr met singem Tuppes avwähßelt. Domet es et an der Spetz vun singe politische Möglichkeite. Et Siggeamp hät keine Setz em Rod vun der Stadt Kölle, en däm die Gaffele vun de große Gewerbe et Regalt han. Fraulück gitt et politisch em Meddelalder nit.
Der Pitter stirv
Wie 1498 der Pitter Lutzenkirchen stirv, zeig et Fygen, wat för en Frau et es. Et gitt de Siggemaacherei op un gitt dat Geschäff dem Lisbeth. Et weckelt üvver Johre de Geschäfte vun singem Mann sillig av, die jo su ärg en der europäische Handel verweckelt sin un handelt selver erfolgreich met Wing un Drugware. Dat Wood „Drugware“ kütt üvvrigens vum niederländische „droog“, wat drüg bedügg. Em Meddelalder sin dat vür allem Gewööze un gedrügte Heilflanze. Us däm Handel entweckelt sich späder uns Drogerie vun hügg.Wann mer dat weiß, es et Fygen nit die Frau em Kämmerche, die singem Tuppes de Sigg wäv. Enä, et es ene glichwäätige Partner för singe Mann un deit sich en der Männerwelt behaupte. Durch si Dun es et zo dä Zigg ein vun de richste Fraue vun Kölle.
Hätt et der Pitter ohne et Fygen gevve künne?
Un eigentlich mööch ich noch wigger gonn. Uns Kääls es hügg jo bewoss: hinger enem starke Kääl, steiht miets och en starke Frau. Mir bliev die Frog: Hätt et der Pitter esu en dä Welt ohne et Fygen gevve künne?De Spur vum Fygen verliert sich noh 1515. Singe Dudesdag es nit bekannt.
Mechel
