E klei Aandenke

Allerhellige es noh

Dröm gitt et hügg e klei Aandenke an ene Minsch, dä eesch em vürrige Johr gestorve es. Ävver domet Ehr villleich e bessche vun im verstonn künnt, muss ich zoeesch koot üvver en Persönlichkeit us der Historie vun Kölle schrieve.

Der Gottfried Hagen

Der Gottried Hagen kenne bestemmp vür allem Lück, die sich met der Historie vun Kölle ov och Literatur bedun. Ganz bestemmp kenne in ävver die Lück, die sich en historischer Dichkuns us Kölle uskenne. Sin dat vill? Ich weiß et nit.

Vun 1230 bes 1299 läv der Gottfried Hagen. Gebore weed hä en Xanten als Sonn vum Gerhard Hagen, dä do der Subdiakon vum Viktor-Steff wor, un vum Blanza Hagen. En Pariss studeet hä nit Theologie, wie singe Papp, sondern Rechswesseschafte un mäht singe Magister.

Vill weiß mer nit üvver die Zigg, se litt jet em Düstere. Mer weiß nit ens, wann genau dä Gottfried vun Pariss noh Kölle trok. Av 1262 mäht hä sich hee ene Name op singem Pössche als Stadtschriever, weil hä als Spezialiss för juristische Text en deutscher Sproch gild.

Em Juni 1262 verfass hä dä Bündniskontrak zwesche Kölle un dem Graf vun Berg un koot donoh die wichtige Sühne vum Ääzbischoff Engelbert II. vun Falkenburg noh singem Öschel met der Stadt. En der Folgezigg schriev hä Renteverdräg, die et en dä Form bes dohin nor en Italie gov. Ävver hä kunnt nit god met de Nüsele ömgonn, die secher kräge hät.

1264 moot hä us der Nud erus Urkunde för dä unbeliebte Bischoff schrieve – un et woodt jet räuhig öm in.1268 weed em Name vum Paps der Kirchebann un et Intedik (et Verbodd, kirchliche Handlunge vürzenemme) üvver Kölle usgesproche. Hee tridd hä nit nor als Schriever op der Plan. Enä, weil hä Juriss es un sich och god en der Kirch uskennt, kritt hä der Opdrag met de päpsliche Gesandte zo verhandele.

Zo dä Zigg schriev hä och dat Werk, dat bes hügg bekannt es. Et es en Chronik vun Kölle en 6289 Reimverse, die die Zigg vun der Christianisierung bes zo dä Zigg, en dä hä läv, beschriev. Un evvens die Chronik es mih wie e schön Rüümche, se präg et Levvensgeföhl vun de Kölsche zo dä Zigg. Un wä weiß? Villleich hät dä Gottfired Hagen grad domet bes en de hüggige Zigg Enfloss op dat genomme, war mir meine, wenn mer „Kölle es e Geföhl“ sage.

Der Bernd Vielhaber

Der Bernd Vielhaber hät sich och „Stadtschreiber“ genannt, ovschüns hä dat nie en dä offizielle Funtkion wor. Och hatt hä sich dä Name „Godefrit“ för Facebook zogelaht. (Die Links fingt Ehr noh däm Beidrag, ganz am Engk.)

Et gitt jo och Parallele. Der Gottried hät singe Wäg us Xante heehin gefunge un der Bernd usem Sauerland. Beids wore Imis un wat die Mentalität betriff nit ganz kölsch. Ävver se wore och faszeneet vun der kölsche Aat. Der Gottfried Hagen hätt doch nie en singer Freizigg dat Werk met üvver 6000 Verse geschrevve, wann im Kölle egal gewäse wör.

Un beim Bernd säht allein dat Krätzche wie hä am Fastelovendsdinsdag 1988 nohm Ihrefeld trick, alles un zeig, wie faszeneed hä wor. Vill vun singe Werke looße ävver och erkenne, wie hä unger dä Ungeräächtigkeit am ligge wor, die jo esu einfach och Alldag es. Verbesse Humor fingk sich off en singe Texte, wann hä dat an der Pranger stellt.

Ich denke, hä hät gehoff, dat die Welt e bessche besser weed, wann hä nor dodrüvver schriev – un och dat kann mer jo beim Gottfried Hagen finge, oder? Un ich muss sage, Bernd wor god em Recherchiere. Saache hät hä erusgefunge an denne ich versag han. För e Beispill, han ich mich luuter gefrog, wat dat för zwei große Figure sin, die en der Sieggfriedstroß bovve om Daach stonn – bes ich dat beim Bernd gelese han.

Der Abschied

Wann mer uns begähnt sin, han mer uns zoeesch luuter gägesiggig e bessche bewundert – ich in, weil hä besser recherchiere un schrieve kunnt wie ich un er mich (ov uns), weil mir met Kölschgänger vill mih gelese weede wie hä. Wat soll ich sage?

Der letzte Endrag op Facebook vun im am 3. September 2019 es e „dito“ üvver ene Link op uns Website „Kölschgänger. Stories über unsere Stadt und ihre Menschen…“. Bes hügg weiß ich nit, ov et Frack es ov Verbungeheit, die dat Wood usdröck. – Koot drop stund ich dann an singem Grav. Ich weede in frage, wann mer uns widder treffe un hoffe, et duurt noch ene Momang, bes ich dat kann.

Kann mer sage, dat dä Bernd un dä Gottfried hee och luuter Woch öm Woche e bessche metschrieve?

Mechel

Hinter diesen Links findet ihr Bernds Seite und die angesprochenen Artikel:https://www.koelnerstadtschreiber.de/https://www.koelnerstadtschreiber.de/karnevalsdienstag…/https://www.koelnerstadtschreiber.de/skulpturenpaar-auf…/Und hier seine Facebook-Seite.https://www.facebook.com/Godefrit