Wat en jecke Idee, die “mir“ do hatte. Wat han ich mich domols geärgert, wie dat Auto op der Treppeturm vum Zeughuus kom. Wesst Ehr noch, wie dat wor? Secher. Ok, weil et esu schön wor un e paar dat lese, die jünger sin wie dat Kunswerk, verzäll ich es noch ens us minger Sich.
Dat Kunswerk
Alsu, mer han ene Künsler, der H.A. Schult. Genaugenomme es et e Künslerpäärche, weil hä en „Muse“ hät, et Elke Koska. Un weil hinger enem starke Kääl miets och e stark Frauminsch steiht, muss mer die einfach luuter zosamme nenne. Die beidse maache luuter Saache, die ich eesch nor beklopp finge un met der Zigg drüvver laache muss, weil et jo och luuter kütt wie kütt un mer am Engk e neu Kreppche han.
Em Johr 1989 gov et ene „Aktionszyklus Fetisch Auto“ för dä die zwei aale Ford Fiestas – sage mer – „kostümeet“ han. Ei Jöckemobil woodt dobei zom Osterei, e ander soch us, wie wann et us Ies wör un noch widder e ander, wie wann et us Marmor wör. Et gov noch mih Autos, ävver 1989 wor ich beim Komiss en Bremen, do han ich dat nit esu genau metkräge.
Dat Auto ävver, dat mir Kölsche vun dä Kunsaktion am leevste hatte, es dat Flögelauto em Beld. Der H.A. Schult wollt zeige, wat mer nit all för e Gedöns öm uns Jöckemobile maache. Ich ben jo och mih för et Fahrradd, wann mer sich en Kölle bewäg, un finge dat och schad, dat mer esu Autobahne medden durch Kölle getrocke han, statt dat mer die Stadt nohm Kreeg widder opgestallt han, wie se wor.
Ene „Fetisch“, finge ich, han ich mem Fahrraddfahre nit, ävver för mich künnte mer ech mih doför dun, dat mer nit esu vill Autos en der Stadt bruche. Ävver god, ich kann nor küüme un han nix zo sage…
Der Franz-Josef Antwerpes
Wä zo dä Zigg nit nor kümme moot, sondern ech jet zo sage hatt, dat wor der Franz Josef Antwerpes. Hä wor vun 1978 bes 1999 Regierungspräsident. Hä wor ene Präsident, dä och ene echte kölsche Bischoff gewäse sin künnt – luuter god doför, Kölsche op der Dress zo gonn. Singe Spetzname wor „Kurföösch vun Kölle“ – ävver mer moochte in och, oder?
Sing Leidenschaff wor, nevven dem Wingaanbau em Regierungspräsidium, Autofahrer zo jage. Die Belder han mer doch noch em Kopp, wie hä hüchsselvs medden en der Naach an der Autobahn stundt un Autos erus gewunke hät, Tempo- un Alkoholkontrolle. Ich gläuve, met dä Lobby, die et Fahrradd hügg hät, wör Kölle jetz ald en andere Stadt.
Jetz muss mer wesse, dat der H.A. Schult un et Elke Koska för die Aktion vun de Ford-Werke gesponsort woodte. Es klor, sin jo och alles Fiestas. Et wor nit nor opwändig dat Flögel-Auto zo maache. – Immerhin sin do üvver en Tonn Ieserbahnschinne dren verbaut, domet et stabil steiht. Eine Flögel allein weeg 800 Killogramm un muss och su ene Sturm wie der Kyrill ushalde. Och wann et Flögel hät, fottfleege wör Dress. – Wie gesaht, mer moochte dat Auto och vun all dä Kunswerke am leevste, wie et 1989 esu om Turm vum Stapelhuus präsenteet woodt…
En Hanakerei?
Wie die Kunsaktion am Engk wor, kome die Autos en de Ford-Werke. Wie die do bei Ford metkräge han, wir mer an däm Deil hange, han se 1991 dat Auto dem Förderverein för et Kölnische
Stadtmuseum geschenk. Evvens dat Stadtmuseum es jo em Zeughuus. Un natörlich kom et domet ganz bovve op de Spetz.
Vis-à-vis vum Zeughuus soß ävver der Antwerpes em Regierungspräsidium un moot der ganze Dag op si Feindbeld op däm historische Bau luure. Hä verstund do keine Spass, dat mer im dat Ungetüm vür et Finster gesatz hät, einfach esu – un loss gingk dat Dänzche.
Hä saht, et wör en Genehmigung nüdig un der Denkmalkonservator Ulrich Krings, dä zo dä Zigg fresch em Amp wor, hätt kein usgestallt. Wor klor, geklärt hatte die dat met dä Frau, die vürher dat Pössche hatt. Et Hiltrud Klier wor der Aansich, dat en vorläufige Installation esu en Genehmigung nit bröht. Wat wells de maache? Der Antwerpes wor Vetreter vun der „oberen Denkmalbehörde“ un saht en dä Funktion „fott domet“.
Die andere hatte ävver der Franz-Josef Kniola vun der „oberste Denkmalbehörde“ op der Plan gerofe… Üvver dä Öschel kunnte uns Bläddcher hee en Kölle bes en et Johr 2005 verzälle, bes op eins der neue Regierungspräsident, der Jürgen Roters, saht „Nä, es god, kann blieve, es doch apaat do om Turm.“ – Langwieler.
Su steiht dat Jöckemobil met de Flögele luuter noch do bovve un jo, för mich gehürt et jetz och dohin.
Mechel
Hinterlasse jetzt einen Kommentar