CCAA
CCAA – Colonia Claudia Ara Agrippinensium. Ich kann jo kei Lating, ävver üvversetz heiß dat wall „De Kolonie vum Claudius un Offerstell vun de Agrippinenser“.
„Vum Claudius“ steiht do wäge dem Kaiser Claudius, dä uns Ubierdörp dä Status „Kolonie“ gov, weil im dat Agrippina luuter esu op de Nöss gegange es, dat et dat esu han mööch. Und deswäge es et för uns dee Mutter vun Kölle.
Blodsbröder
Dobei han jo ihter – hee em Beld – der Winnetou un der Old Shatterand doför gesorg, dat hee jet loss es. Jetz weede ich zo läppsch? Mag sin. Manchmol muss ich mir dä Vörwurf gefalle looße. Ävver dat Kreppche vum Augustus un vum Agrippa, dem Großvatter vum Agrippina, es e dramatisch Verzällche vun Fründschaff, vum Kamf, Sigg an Sigg un am Engk vun Blodsbröderschaff.
Der Gaius Octavius weed der Augustus
De Iden vum Määz em Jahr 44 vür Chresstus (v. Chr.). Mer wesse wat passeet. Der Gaius Julius Caesar weed bei ener Sitzung vum Senat vun ener Grupp Senatore, die sich öm der Gaius Julius Brutus un der Gaius Cassius Longinus gebildt hät, met 23 Messersteche avgemurks. E Komplott!
Der Ervsonn vum Caesar es der Gaius Octavius, dä 63 v. Chr. gebore es. Dä hät ene richtig gode Schullfründ, der Marcus Vipsanius Agrippa, dä ei Johr jünger es. Beids sin grad noch Lällbäcke, han bestemmp vill Dress em Kopp un sin an däm Dag an der Adriaküss, wie der Gaius Octavius kapeet, dat hä engriefe muss, wann hä singe Maachaansproch durchsetze mööch. Engriefe en ene brutale Maachkamf zwesche mächtige Caesar-Aanhänger un de Mörder vum Caesar. Ääns genomme un üvverhaup wohrgenomme weed hä zoeesch vun keinem. Ävver hä setz sich em Johr 42 v. Chr. durch, gewennt durch gewetzte Politik un Schlaachte, die god gefoht sin, an Maach un weed em Johr 27 v. Chr. zum „Augustus“ erhovve, Alleinherrscher.
Der Agrippa – mih wie ene „Fründ“
Luuter an singer Sigg es der Agrippa. Hä hät e Hängche för et Kreegshandwerk un es ene gebeldte Spezialiss för de Verwaltung. Im flupp et och, dat hä mih weed wie nor Ritter, wie singe Papp eine es. Hä weed, en enem Ömfeld, wo de Herkunf mih zällt wie et Künne, dä Kääl, dä die zweitmieste Maach hingerm Augustus hät. Hä bliev im ävver trotzdäm ene treue Fründ un noch mih! Hä trennt sich vun singer Frau, dem Octavia, öm et Julia, de Doochter vum Augustus zo hierode. Wat es do ald ene Retz mem Metz un et Openanderdröcke vun Ungerärm?
Der Agrippa kütt nohm Rhing…
Domet hät hä ävver och noch nit genog ze dun gehat. Koot nohdäm der Augustus et Regalt hät, es der Agrippa vermodlich en de Johre 38/39 v. Chr. hee bei uns en Niedergermanie. Hä erkundt et Land un hät em Senn, et römische Rich hee ze festige. De römische Maach hee wor nit grad gewess. Eets em Johr 55. v. Chr. kome der Römer et eetse Mol üvver der Rhing
.…un mäht et sich gemödlich
Si Schachzog es bekannt. Hä fingk die jet hühere Stell am Rhing, die strategisch god litt. Hee, wo mer 2060 Johre späder gemödlich setze un op uns Computere entippe un uns Sorge öm avstrakte Gefahr maache, hät Rom met der Secherung vun der Kolonie konkreete Brasel.
Glöcklich es do, dat die Ubier, de andere germanische Stämme zo römerfründlich es. Die griefe de Ubier am laufende Meter aan, esu dat de Ubier luuter mih unger Drock kumme. Em Johr 18/19 v. Chr. nötz der Agrippa die Lag un zwingk se en e Pak met Rom – ov deit inne Schotz gewähre. Wie och immer. Wann et die Blodsbröder nit gegovve hätt, wär hee… …nit Kölle.
Dat es doch spannender wie „Winnetou un Old Shatterhand“! Wat wör dat ene Stroßefäger.
Mechel
