Hügg muss ich Üch koot ens jet froge. Säht Üch dä Begreff „Kölntriangel“ jet? Ich muss luuter üvverläge, wat gemeint es, wann dat einer säht. Ich sage „LVR-Turm“. Bin ich domet allein? Ich meine, ich weiß, dat dat der „Kölntriangel“ es, ävver dä Name es mer jet ungewennt.
Woröm ich dat froge? Weil ich jetz gelese han, dat der Kölsche zoeesch „LVR-Turm“ gesaht hät un sich jetzt dä Name, dä vun Aanfang an dä vum Projek wor, durchgesatz hät. – Alsu, bei mir nit.
„LVR-Turm“ han mer jo all gesaht, weil de Zeidunge et geschrevve han. Die kome op dä Begreff, weil dä Turm vun der „Rheinischen Versorgungskasse“ gebaut wooden es un die widderöm es ene Deil vum „Landschaftsverband Rheinland“ – LVR.
Ich weiß noch god, wat mer domols, esu öm 2004 eröm, för ene Disköösch hatte, weil se dä Turm geplant han un op eimol de UNESCO gesaht hät, dat der Dom nit mih Weltkulturerbe sin künnt, wann mer huhe Hüüser zo noh an in dran setze dät. Dat mem „Weltkulturerbe“ kann jo Sähn un Floch zoglich sin, su wie dat mem Denkmolschotz. God, koot hat ich selvs och Angs öm et Panorama. En Kölle üvverdrieve mer et jo gään mem Baue. Em Johr 2006 wor ich ävver beruhig. Ich han mich üvverzeuge künne, dat dem Dom nix Schlemmes passeet es, durch dä neue Bau op der Schäl Sick. Dä Turm wor fäädig.
„Kölntriangel“ heiß hä, weil hä drei leich gewölvte Sigge hät, die e Dreieck belde. Dat muss mer eesch ens verstonn, weil hä unge noch rund es un eesch bovve e Dreieck weed. Für mich süht hä ärg rund us un hä künnt och en Elipse, die spetz zoläuf, sin. Ich ben dröm eröm gelaufe un han die Ecke gezällt – et sin wirklich drei. Hä hät, wie dat esu en Mode es, ene Glasfassad. Ich ben keine Fründ vun zo vill Glas, ävver dat lööt in leich ussinn un hä blink schön, wann et Sönnche drop steiht. Ich finge in god gelunge, wann mer ald esu huh baue mööch.
Dä Turm hät eine Vürdeil gägüvver dem Dom: mer weed för drei Euro mem Fahrstohl eropgeschosse un muss nit klabastere. Op ener Plattform, die 103 Meter huh litt, kann mer sich Kölle beluure. Wat heiß Kölle? Vun Düsseldorf bes nohm Sibbegebirg kann mer sinn un vum Bergische Land bes, jo ich gläuve, wat do hinge manchmol schimmert, es der Ärmelkanal – oder nit? Mehr steiht hee fünf Meter hüher wie wann mer op der Ussichspunk vum Dom eropgeklomme es. Un mer hät mih Plaatz. Op 400 Meter vedeile sich de Lück ganz god. Do fingk jeder si Pläätzche för e schön Beldche vun Kölle. Ich muss gestonn, dat et manchmol och vergnöglich es, do bovve ze luure, wat die Lück aanstelle, för om Beld met Kölle drop, besser uszesinn wie et Panorama. Dat es schwer! Off bruch mer vill Färv un e koot Wöbche. Mer kritt dann zwor Influenza, ävver weed doför Influencer. Es dat jetz zo fies? Egal, ich well nor sage, hee stepp der Bär.
Ävver et Beste bliev: dat Panorama. Mer steiht jo op der Schäl Sick un luurt op et aale Kölle erunger. Wann ich Besök han un jet üvver Kölle verzälle well, dann gonn ich hee hin un kann vun einer Stell us zeige, vun wo bes wo de Römer gebaut han, wo et Kölle usem Meddelalder üvverall wor un der ganze Ress. Wann mer widder ens ene Dag han, an däm et Sönnche jet mau schingk, kann mer vun do god fotografeere, weil et Leech dann nit esu en de Finstere reflekteet un villleich der Himmel esugar jet „Drama, Drama, Drama“ mäht. Lohnt sich.
Un noch ene Tipp: wann mer ech partout mem Jöckemobil en de Stadt well, es unge ungerm Aanbau, dä mer „LVR-Horionhaus“ nennt, vun der „Hermann-Pründer-Straße“ us, e Parkhuus, dat off noch Plaatz hät, ze han. Mer kütt jo flöck üvver en Bröck noh der Aldstadt – wenn mer nit en Düx blieve well.
Öm ävver widder ming Frog vum Aanfang ze kumme: wie heiß dä Turm bei Üch un wie fingt Ehr in?
Mechel
Hinterlasse jetzt einen Kommentar