Kölsche Weihnaach

Mir es do dis Woch jet klor gewoode.

Weihnachte es jo wie der Fastelovend. Schön, ävver et hät och Deile, die mag ich nit esu. De Drängelei un et Geschurvels zwesche Bude met luuter nor belligem Krom, dä düür verkauf weed, un Fressbude. Et mag och dran lige, dat wann ich ens Zigg han, entweder et Wedder schlääch es ov grad ganz Kölle zosamme met Holland, Belgie un Frankreich do es un de Engländer och noch engefloge weede, för sich hee „Jingle Bells“ vum Band aanzehüre un Tinnef ze kaufe.

Wie ich letzze Woch am Vürplatz vun Zint Gereon aankumme been, hät do de Gemeinde e paar Büdcher stonn un wor sich met Glöhwing un Musik am Vergnöge. Do ben ich jo neugierig un stelle mich dobei. Koot drop weede de „Vogelsängerinnen“ aangesaht. Wat ich weiß es, dat dat ene Chor vun Fraulück us Vugelsang es, dä nor kölsche Leedcher singk. Ene ganze Chor op däm klei Fess? Se han jo nit ens en Bühn!

Ävver et geiht. Der Chor steiht evvens en enem Huusengang un nötz dat Leech, dat vun der Beleuchtung vum Trappehuus kütt, för de Note ze lese – un leck mich en der Täsch, klingk dat god! Kölsche Weihnaach, einfach esu vun enem Chor vun Fraulück, die et ganze Johr übe, för sich am Engk en enem Huusengang widderzefinge, nor för kölsche Leedcher ze singe. Do woodt mer klor, dat ich Weihnachte doch mag un et miets nor verkeht aangonn. Weihnachte gehürt en et Veedel, wie der Fastelovend.

Ganz hinge, om Beld nit erzekenne, entdecke ich et Helga, die ich vun der Arbeid us kenne. Et süht mich, deit winke un hingerdren laache mer zosamme un et verzällt:

De Vugelsängerinne treffe sich zick mih wie 30 Johr un übe jede Dinsdag för zwei Stunde zesamme. Dat fing aan, wie sich zwei Fraue vun Kääls usem Männer-Chor en Vugelsang üvverlaht han, dat Fraulück dat och künne. Baal funge sich 16 Frauminsche, die et usprobeere wollte un dat Schmölzche wohß dann flöck op 30 Sängerinne aan. Dä Chor singk met zwei Sopran-Stemme un einer Ald-Stemm un hät e Repertoire vun 83 kölsche Leedcher, vun däm se för de Weihnachtssaison zwölf fess enstudeet han. Wie ich „83!“ rofe, kütt als Antwood „Jo, jo, Leedcher nor för de Weihnachtszigg. Dann han mer noch en Mapp för der Ress. Dat sin och 87.“ Un wigger säht et Helga, dat et, wie et vör veer Johr aankom un metmache wollt, et eesch ens su en Mapp kräht – un zeig mem Duume un mem Zeigefinger bestemmp drei Zentimeter. Do durf et dann Leeder studeere, die et vürher noch nie gehürt hatt. Ich han an dä Stell dann nor noch an mingem Kölsch gedrunke…

Wann ich et rääch metkräge han, es üvvrigens vun all dä Leedcher „Die Glocke vun Kölle…“ dat, wat se am leevste han.

Wie ich om Heimwäg esu üvver dat fidele Schmölzche met all dä Levvensfreud, die et hät un die et wigger gitt, nohdenke, kütt mer en der Senn, dat ich selver de „Sölzer Ringeldüvcher“ un natörlich et Chor-Schmölzche vun de „Fründe vun der Akademie för uns kölsche Sproch“ kenne. Ävver ich gläuve, et gitt noch mih Minsche, ov Fraulück ov Kääls, die op Kölsch singe. Wä vun Üch singk dann och? Un wie heiß Üüre Chor? – Un villleich hat ehr ene Tipp, wo Ehr wann sid? Domet mir all ens ene schöne Momang em Advent han künne.

Mechel

–
Alle unsere Artikel findet Ihr wie immer hier: koelschgaenger.net. – jetzt könnt ihr soger einen NEWSLETTER abonnieren!

Ihr überlegt, Euch auch aktiv in einen Chor einzubrigen? Hier findet ihr die http://www.vogelsaengerinnen.de/

Hier den der Fründe vun der Akademie: http://www.fruende-akademie.de/chor-schmoelzchen.html

Die Sölzer Ringeldüvjer haben ihre website hier: http://www.soelzer-ringelduevjer.de/

Und einen Tipp habe ich vor Veröffentlichung bekommen: Die Himmel-un-Ääd-Glöckcher. Wer hat denn da eine Seite, wo man sie findet?