Böcherschääf

Jetz han ich letzte un vürletzte Woch geschrevve, wo ich hee en Kölle gään spazeere gonn. Ävver wat hilf mir jetz, wann et Wedder uselig es ov ich kein Loss han, erus ze gonn? Kütt jo vür.

En der Meddagspaus stonn ich op eins vür dä Antwood op die Frog: Böcherschääf! Do darfs do erenluure un metnemme, wat der gefällt un häs e paar schöne Stunde – för ömesöns. Wann do dat Boch nit mih han wells, lägs do et widder zoröck en et Schaaf. Un wann do beschlüüß, dat do dat Werk unbedingk bruchs, es et dir. Do darfs et behalde, einfach su. Esu leich kann et Levve en Kölle sin. Wat woanders Kläu wör, es hee genau esu gedaach! Do häs nor dat eine Risiko, dat do nie weiß, wat do grad esu dren litt. Su e Böcherschaaf es e Üvveraschungsei.

Un jetz kütt et noch besser: wann do Böcher zo vill häs, die do nit mih bruchs, kanns do die do och einfach erenläge. Mer soll bloß drop aachte, dat mer nor Böcher eren gitt, die mer selvs och aanpacke dät, wann se evvens nit vun dir selvs wöre. Alsu nix, wat dreckig ov kapodd es. Su e Schaaf es keine Aldpapiercontainer. Es doch logisch. Wann et Böcherschaaf voll es, muss do ding Böcher och widder metnemme. Es doch och klor, wann et rähnt gonn Böcher donevve doch kapodd.

Jetz hät der Mechel et Schoss erus un schriev üvver Böcherschääf? Die kenne mer doch ald? Der nöchste steiht doch de Eck eröm! Es klor, wä e Böcherschaaf öm de Eck hät, hät sich flöck dran gewennt. För mich sin de Böcherschääf en Kölle die Erungeschaff vun de letzte zehn Johre. Versök ens en Datei, die do beim Amazon gekauf häs, enem andere Minsch zo gevve. Geiht dat üvverhaup, dat do do di Eigetum anonym verschenks? Ich kenne kei Schaaf, dat em Johr 2009 ald stundt un deswäge sage ich, dat die Böcherschääf för mich die Errungeschaff vum letzte Jahrzehnt sin.

Ich stonn do jo och luuter vür, wann ich vörbei kumme un verrenke mer der Hals, öm de Titel ze lese. Av un aan nemme ich e Boch met. Mi Altargeschenk, dat weiß ich, läg do och off jet eren un freut sich, wann et jet för zo Tuusche gefunge hät. Do muss ich dann fies oppasse, dat ich dat Boch, wat ming Künnigin erengelaht hät, nit widder heimschleife. Ich finge su en Böcherschäff besser wie de ganze Pappkartons met Böcher un Schrott, die mer em Momang üvverall op der Stroß süht. De Stroße sinn grad am Wochenengk us, wie wann er mer ene Aldräuscher vür de Dür gesetz hätt. Ben Ich do zo speeßig? Met so enem Böcherschaaf weiß do secher, wo do e Boch finge kanns. Alsu, wat soll dat?

Ich wollt ens wesse, wie die Schääf üvverhaup dohin kumme. En Antwood fingk mer em Netz flöck. De „Bürgerstiftung Köln“ kömmert sich dröm, dat die opgestallt weede. Nor, esu e Schaaf koss zwesche 5.000 un 10.000 Euro. Do muss sich eesch einer finge, der dat berapp – dat sin Lück wie do un ich. Et kann en Nohberschaff sin ov e Veedel, dat zesammeläht.

De Steftung kömmert sich öm de Formalie, dat su e Schaaf opgestellt weede darf un och weed. Jo, un dann muss sich noch einer dröm kümmere, dat et Schaaf sauber bliev un Böcher erus kumme, die nit ganz dat sin, wat do dren sin soll. Dat es Arbeid un da muss mer dranblieve, wie wann mer jede Woch för der Kölschgänger jet schriev – nor dat do keiner op „like“ däut. Dat es Ihreamp. Sujet mäht mer, weil et Hätz dat befählt.

De Bürgersteftung mäht üvvrigens noch vill mih. Luurt einfach hee: https://buergerstiftung-koeln.de/ En dä Steftung kann mer för 500 Euro Metgleed weede un metbestemme, wat die Steftung mem Geld maache soll. God, jetz hät nit jeder 500 Euro. Wann do nor 10 Euro häs, kanns do allein och nix för et Veedel maache. Ävver wann do do e Projek mags un denne sähs, die 10 Euro, die mööch ich för dat ov dat Projek gevve, hilf dat. Alsu ich hör‘ op ze schrieve un luure mer die Sigg noch jet aan.

Ich maache jetz ävver Reklame? Jo han ich dann hee jemols jet anderes gedon, wie üvver dat ze schrieve, wat ich spannend finge? Enä, oder? Un immerhin arbeide die zick mih wie 10 Johr och för mich, dat et mir hee en Kölle god geiht. Och en dä Zigg jetz. Dankeschön.

Mechel