De KD

De „Köln-Düsseldorfer Deutsche Rheinschifffahrt GmbH“, koot „Köln-Düsseldorfer“ un eigentlich sage mer nor ganz koot „KD“. Av un zo esu en Tour mem Böötche maache, es doch fing. Zogegovve „Böötche“ es ungerdrevve, dat sin Scheff. Ävver: et Sönnche schingk, mer setz bovve an der fresche Luff, drink sich e Kölsch un lööt et Panorama vürbeitrecke. Göddlich, oder? Do denk mer nit mih üvver su Froge noh un lööt sich drieve.

Wat mich nor stürt, es dä Name. Muss dat sin, dat e Ungernemme, dat esu fass met Kölle verbunge es, usgerechent „Düsseldorf“ em Name hät? Es dat nit en Strof? Wie kunnt dat esu kumme? Dat wollt ich ech ens wesse.101848172_782220315516614_8424288805883740160_o

Am Aanfang vun enem Ungernemme es luuter ene Minsch, dä bestemmp, dat et dat Ungernemme jetz gitt. En däm Fall es dat der Pitter Hein Merkens. Hä läv vun 1777 bes 1854. Gebore weed hä en Müllem am Rhing, dat dozomol noch nit bei Kölle gehürt. Der Vatter, der Mattes Daniel Merkens, wor do ene Bäcker un evangelische Diakon. „Rich“ wore se secher nit. Ävver ich gläuve, e bessche jet an de Föß hatte se doch, weil der Vatter ald em Johr 1780 stirv un singe Sonn, der Pitter Hein, trotzdäm an ener Handelsschull en Müllem liere darf. Dat muss mer jo eesch ens berappe künne.

Wie der Pitter Hein Merkens 14 Johr ald es, wähßelt hä gescheck nohm große Handelshuus Everhard Casper Schüll en Kölle un liert do wigger. Wie hä domet fäädig es, fängk hä beim Jan Köbes Schüll em Gewööz und Wing-Handel aan. Dat es ene wichtige Schredd för sing Karrier, weil hä domet ganz noh beim Gründer vum eeschte Handelsvürstand vun Kölle es. Der Handelsvürstand es der Vürläufer vun der „Industrie- und Handelskammer“. Koot un god: us däm Bäckersonn weed ene Mann met Enfloss. Hä es ene Händler met Aki. Am Bankhuus Seydlitz & Merkens es hä beteilig, merk ens jet. En Versicherungsgesellschaff, us dä am Engk de Agrippina-Versicherung weed un och de Colonia-Versicherung gründ hä. Hä hät och de eeschte Präsidenschaff vun der neue Industrie- un Handelskammer un vertridd Kölle gägeüvver de Preuße em neue Provinziallanddag en Düsseldorf. Ävver dat verzälle ich nor, domet mer en Vürstellung dovun kritt, wä dä Mann wor, dä em Johr 1825 de „Preußisch-Rheinische Dampfschifffahrt-Gesellschaft“ en et Levve röf.
Am 1. Mai 1827 fäht met der „Concordia“ et eeschte Damfscheff för die Firma met Handelsgod vun Kölle noh Mainz un ald am 8. Juni 1827 folg de „Friedrich Willem“. Dat Ungernemme wähß flöck un weed av 1832 sugar an der Börse en Kölle noteet.101572408_782220215516624_68892297630056448_o

Do passeet jet, dat gefährlich weed: Kauflück vun Mainz, Elberfeld-Barmen un Düsseldorf wolle 1838 e Stöck vum Koche avhan un gründe 1836 die „Dampfschifffahrtsgesellschaft für den Nieder- und Mittelrhein“. Die Konkurrenz bedügg Kreeg: Weddfahte om Rhing un Prieskreeg wor der Alldag om Rhing. En de 1840’er Johre han de Kapitäne esugar de Scheff vun der Konkurrenz gerammp! Su kann mer nit vernünftig weetschafte.

Em Johr 1853 einige beidse Sigge sich op en Betriebsgemeinschaff. Die „Kölnische und Düsseldorfer Gesellschaft für Rhein-Dampfschifffahrt“ deilt sich der Rhing vun Straßburg bes Rotterdam op un beschlüüß ene gemeinsame Fahrplan. Em Verlauf vun der Industrialisierung wolle sich luuter mih Minsche erholle un dä Wunsch kütt op, zom Vergnöge om Rhing fahre zo künne. Av 1867 deilt mer sich och et Geschäff. Met der „Humboldt“ un der „Friede“ fahre zwei eeschte Scheff, die nor för et Vergnöge do sin.

Nor, dat Geschäff mem Rhing weed durch der Usbau vun Stroße un Schinne, die jo och en Konkurrenz sin, luuter diffisiller. Su beschleeße die zwei Gesellschafte, die jo immer noch vunenander unavhängig sin, em Johr 1925 de Verwaltunge zosamme zo läge un su Koste ze spare. De „Dampfschifffahrtgesellschaft für den Nieder- und Mittelrhein“ us Düsseldorf geiht no en de „Preußisch-Rheinische Dampfschifffahrt-Gesellschaft“ op – dat es mir jetz wichtig zo sage. Zickdäm heiß die Firma ävver och „Köln-Düsseldorfer Deutsche Rheinschifffahrt GmbH“.100750000_782220225516623_7303622424065474560_o

Mer kann jetz sage „Sühs do, nor Knies met de Düsseldorfer, versöke se doch dem Merkens et Ungernemme kapodd ze maache.“ ov „Ene gode Kompromiss han se do gemaht“. Et es egal. Jetz, wo ich mir bes op et i-Pünkelche klorgemaht han, dat die Gesellschaff nit anders kann, wie et „Düsseldorf“ em Name zo han, mäht et mer widder vill mih Freud, em Netz noh der nächste Tour ze luure.

Mechel

Wer sicht jetzt sofort informieren möchte, was die KD im Moment bietet, dem sie die Hompage ans Herz gelegt: https://www.k-d.com/de/

likeheartlaughterwowsadangry
0

Hinterlasse jetzt einen Kommentar

Kommentar verfassen

Diese Website verwendet Akismet, um Spam zu reduzieren. Erfahre mehr darüber, wie deine Kommentardaten verarbeitet werden.