Friedenswald Rudekirche

„Un dann hätt der Konrad Adenauer, wie hä Kanzler gewoode wor, de Botschafter vun alle Länder, met denne mer diplomatische Beziehunge zo han, bei sich enbestallt un se jeder noh enem Same vun enem Baum gefrog, dä en däm Land wähß, wo hä herkütt.“

Ich wollt e klei Gängelche durch der Forsbotanische Gaade gemaht han. Ävver dä es grad zo. Alsu gonn ich nevvenaan en der „Friedenswald“. Mer muss dobeisage, dat dä Name „Friedenswald“ verkeht es. Et es ene Park un keine Wald. Ene Friedenspark han mer ävver ald an der Südbröck.

Der Friedenswald es vun 1979 bes 1981 op Buureland aangelaht woode un tatsächlich stonn do Bäum vun üvver 140 ungerscheedliche Länder. Hä es e Kind vum Kaale Kreeg, dä vun 1947 bes 1991 ging un der Wunsch noh Fridde wohß. Mer wesse jo noch all, wie mer am opröste wore, weil mer fass däglich op Rakete usem Ossblock gewaadt han – die nie gekumme sin. Dä Kreeg blevv kald.

Wie ich lossgonn, muss ich tirek griemele: „Ehem. Deutsche Demokratische Republik, Winterlinde“ steiht op däm Schild. Et es ech schwer, su ene Park politisch aktuell ze halde, esu flöck, wie die Welt sich driht.

Der wessliche Deil gefällt mer god. Europäische Bäum sin en Insele zesammegefass, die esu stonn, dat sich vill kleine Lichtunge opdun. Mer kann e Sonnebadd nemme ov sich mem Fisternöllche treffe un litt dobei e bessche su, dat mer nit luuter tirek gesinn weed.

Noh de europäische Länder kumme Bäum vun afrikanische Länder un et Terrain deit sich op. Mer fingk sich op eins en ener hüvvelige Landschaff met große wigge Wise widder, die met Wäge durchtrocke sin. Es klor, wo mer om platte Land Hüvvele herkrige? Kreegsschutt – pass jo och. Ävver die afrikanische Bäum han et mir aangedon. Ich woss jo nit, dat et en Nigeria Haselbäum gitt, Rudeiche en Gabun, dat Ruanda Zierkeesche hät un – jetz kütt et -, dat staatse Himalaya-Birke em Kongo stonn. Birke sin för mich skandinavische Bäum. Jetz stonn die och em Kongo? Un die drage der Himalaya em Name? Kann et sin, dat die Bäum em Kongo der kölsche Winter nit ushalde – also dozomol nit usgehalde han – un se för der Kongo nor ene schöne Baum dohin gestallt han? Schon allein, weil ich do esu drüvver simeleere kann, hät sich dä Usflog för mich geluhnt. Ävver staats es die Birk. Schamme muss mer sich em Kongo för se nit.

Un esu gonn ich wigger noh de andere Kontinente: en Judasboch us Afghanistan, ene Schneiball us Birma, die schöne Blodboch us Australie, en Schmucktann us Chile, för minge Fründ Jeffe us Brasilie en Jeffrey-Kiefer un noch vill mih. Alsu, dat muss mer sich selvs beluure. Ich kumme usem Staune nit erus. Un usserdäm, su kann mer die Dag och en Weltreis aantredde…

Irgendwann muss ich en Paus maache. Dat Deil hät 4,5 Killometer Wäge un ich laufe jo vill op der Wis eröm. Wie ich noh ner Stell för en Rass söke, finge ich „ming“ Plaatz – ene wunderschöne Baum met ener Bank drunger. Enä, ich sage nit, wo die es. Wer do es, süht die bestemmp. Ävver ene Tipp: vun do us sinn ich op dä große Spillplatz met fingem Quarzsand. Respek. Hee hätt ich fröhter och gään getob.

Dä Satz am Aanfang kütt vun enem finge äldere Häär, dä mich do aansprich, wie ich ei Fotto nohm andere maache. Mer kumme üvver sing spannende Vergangeheit, de Historie vum Park un am Engk natörlich och üvver der Konrad Adenauer en et Schwaade. Nor, dä Konrad Adenauer wor 1967 dud, wie well hä die Same vun Bäum organiseet han, die in enem Park stonn, dä et eesch zick 1981 gitt?

Hee finge ich, dat dat god sin kann. Der Konrad Adenauer hät doch der ganze Gröngöödel geplant un hä hät off wigg en de Zokunf gedaach, wie mer an Projekte wie der Mess süht. Dä Park met singe 26 Hektar, es dä Deil vum Göödel, dä eesch ganz am Engk fäädig gewoode es. Alsu, ich gläuve däm Mann, dat die die Same us ener Schatull vum Konrad Adenauer genomme han. – Un wann hee nor der geistige Same opgegange es.

Mechel

likeheartlaughterwowsadangry
0

Hinterlasse jetzt einen Kommentar

Kommentar verfassen

Diese Website verwendet Akismet, um Spam zu reduzieren. Erfahre mehr darüber, wie deine Kommentardaten verarbeitet werden.