Rusemondag

Hat Ehr Üch ens gefrog, woröm mer för der Rusemondag „Rusemondag“ sage? Dat es jo esu selvsverständlich der Rusemondag, wie der Veilchedinsdag der Veilchedinsdag es. Ich kumme op dat Thema, weil bei bei der Arbeid einer „Fastnacht“ för dä Dinsdag geschrevve hät. Dat hät ävver och esu gar keiner verstande. Hä hatt dä Begreff „Fastnacht“ för dä Dag genomme, dä bei uns ganz natörlich der „Veilchedinsdag“ es – ävver woröm?

Öm et koot ze maache: am Engk wesst Ehr nit mih wie vürher – ävver Ehr sid jo och beim Kölschgänger en der Schull… Dismol es et esu, weil sich nix beläge lööt un se ale nor rode, wie et gekumme es:

Wann mer jet sök, stüss mer flöck drop, dat et nevven dem Rusemondag un dem Veilchedinsdag och der Tulpesonndag un der Nelkesamsdag gitt. Dä! Ich selvs han jetz ald jet Neues geliert.

Die zwei Bezeichnunge vun de Dage hät mer wall bei der Rusemondag gepack, weil et esu löstig klingk un die Blömcher hee wichtig sin.

Nelke fingk mer av un aan bei Marie-Beldnisse. Se sin e Symbol för Liebe, Verlöbnis, Fründschaff – jo un och Huffäädigkeit. Ävver evvens och för de göddliche Liebe. Un dat domet de Nelk e Blömche es, dat för Kölle vun Belang es, dat muss mer doch en der helligste Stadt nördlich vun de Alpe keinen mih verklöre.

Tulpe sin jo Immigrante us Persie un kome em 16. Johrhundert noh Holland, weil de Holländer vill en Konstantinopel wore. Domet wore de Tulpe üvver de Handelswäge ävver och flöck en Kölle. Tulpe stonn vür allem för Liebe, Zoneigung, et Levve, Fruchbarkeit, et Fröhjohr, ävver och Vergänglichkeit. Pass doch en der Fastelovend, oder?

Un wie kütt et no zom Rusemondag? Do gitt zwei wichtige Meinunge. Die eine sage, et kütt dovun, dat en der Medde vun der Fastezigg der Rusesonndag litt. Op Lating heiß dä offiziell „Laetare“. An däm Dag hät der Paps en golde Rus geweiht un se enem Minsch üvverreich, dä jet Wichtiges för de Katholische Kirch gedon hät. Tirek noh däm Dag, am Mondag, kom fröhter et „Fesskomitee Kölner Karneval“ et eeschte Mol zesamme för der neue Zog ze plane. Esu hät sich der Begreff „Rusemondag“ gefunge un es hingerdren op dä Dag üvverdrage woode, an däm der Zog geiht.

Sprochforscher sage, dat die Erklärung üvver et Fesskomitee zo wigg hergehollt es. Sei meine, dä Dag kütt vum „Rasen“. Et wör der „rasende Mondag“ ov „Rosemondag“, weil der Fastelovend do om Hühepunk es un et Rheinland am Rose es.

Jetz kann mer sich ussöke, wat för en Version mer besser fingk. Ich finge, wichtig es, dat de Rus nit nor för Vollkommenheit un Reiz steiht, sondern och för Verschweegenheit. En Tugend, grad em, ävver nit nor, em Fastelovend.

Un wie pass jetz de bescheide Vijul bei all die staatse Blömcher, die irgendwie all för et Thema „Liebe“ stonn? Mer weiß et och nit secher. God, de Vijul steiht och för Liebe, ävver ihter em Senn vun Bescheidenheit, Hoffnung un Treu, wat uns noh dä rösige Roserei widder op die Ääd brängk. Andere sage, dat dä Begreff „Veilchedinsdag“ en Alfter opgekumme es, wo mer lange Zigg Vijule gezüch hät un die an däm Dinsdag do om Zog verdeilt woodte. Vun do us soll dä Name bes noh Kölle gekumme sin.

Wie och immer, et wichtigste Wood em Fastelovend es un bliev „Strüüßche“ – nevve „Bützche“.

Kölle Alaaf!

Mechel

likeheartlaughterwowsadangry
0

Hinterlasse jetzt einen Kommentar

Kommentar verfassen

Diese Website verwendet Akismet, um Spam zu reduzieren. Erfahre mehr darüber, wie deine Kommentardaten verarbeitet werden.