Möler Bock

Wat mäht Levvenskünsler us? Gauigkeit? Dreistigkeit? Gelooßenheit? Wetz? Et gitt eine Tuppes, dä esu unglaublich wor, dat mer sich esugar gään vun im usnötze leet. Dat es hä:

Der Hein Pitter Bock, genannt der Möler Bock, weed am 30. Juli 1822 gebore un wähß en der Maximinenstroß op. Dat es hügg die große Stroß, die nohm Breslauer Platz am Bahnhoff föht. 1822 wor et do genöglicher, dann unse Bahnhoff woodt jo eesch av 1857 tirek nevvenaan gebaut.

Dä kleine Hein Pitter es ald en fröhe Johr ene komische Hellige. Hä hät ene besondere Zogang zur Kuns, däm nit vill Kölsche folge künne. En der Schull hät hä nor Knies, esu extravagant tredd hä op. Si Elderhuus dekoreet hä gään vum Parterre bes an et Daach met aale Belder, wann en der Nöh Kirmes es, setz sich op der Givvel un beluurt sich die Lück, die verwundert noh bovve sinn. Ganz klor ene Selvsdarsteller.

Ungerordne? Sage mer, hä versök et un meld sich met 19 Johr bei de Düxer Dragoner. Selvs de haade preußische Militärs bränge im kein Zuch un Oodnung bei un gevve sich flöck geschlage. Hä flüg rääch baal erus. Jet us dä Zigg präg si Ussinn ävver zick däm si Levve lang: ene Sporre, als fröhere Kavalleriss, dräht hä luuter am Schoh.

Hä entscheid sich ungeloge för e Levve op der Stroß. Off fingk mer in en eine vun de Böge vun der aal Stadtmuur, en denne hä em Sommer ene Kruf-Eren hät. Weed et en Kölle kald, sök hä sich ene Möbel- ov Kollewage. Sie Lieblingsungerkunf ävver es ene große, ieserne Damfkessel am Rhingofer. Ich schrieve dat esu. Vürstelle kann ich mir dat nor schwer. Vür allem, weil hä us luuter Fuulheit dat Schecksal selvs wählt.82925485_696606444078002_5772356434310201344_o

Uvvrigens, Fuulheit: wä fuul es, muss gewetz sin, öm durchzekumme. Klor, oder? Hä hät sing Tricks. Am bekannteste es wall die Eigenaat, met enem große Blomestruuß, dä kunsvoll gebunge un selvs geplöck es, bei Dame opzetauche, die Namensdag han. Wäm et grad usem Senn es: dä Kölsche an sich es katholisch. De Dage vun de hellige Namensvetter weede gefiert. Esu üvverreich hä alsu de Dame vum Huus, am leevste vun enem Weetshuus, der Struuß, gratuleet höflich met Deener un Baselemanes un lööt sich enlade. Hä kritt jet ze müffele un ze süffele. Un hä soll, trotz dat hä mer im et Vatterunser durch de Reppe blose kunnt, ärg vill gegesse un getrunke han. Wann hä ävver genog von dä Gesellschaff hät, veravscheed hä sich endäm hä singe Glöckwunsch widderhollt, saht, dat hä en andere Dam mem gliche Name sing Aufwartung maache mööt, geiht nohm Blomestruuß, trick en us der Vas un schrigg ohn e Wood ze verliere durch de Dür.

Mer mööch jo meine, dat hä beim nöchste Mol an der Dür fottgescheck weed. Enä! Sing Optredd sin su ungerhaldsam, dat die Dame hoffe, dat hä vürbeiluurt. Wä nit mem Besök bedaach weed, es enttäusch. Beklopp, oder? Sich en Beliebheit schmarotze. Dat es nor e Beispill vun dä ville Anekdötcher, die üvver in verzallt weede.

Natörlich pass esu en Krad nit en de preußische Zigg. Em Winter 1872/73 weed hä, wie och et Fleuten Arnöldche, en der Arbeidsaanstalt Brauwieler enquarteet. Die Beziehung zwesche dä zwei es su spannend, dat ich ald längere Zigg dorüvver nohdenke, wat passeet sin künnt un secher dämnächs och drüvver schrieve.

Dat hä op eimol fott es irriteet de Kölsche, mer rödselt. Die „Germania“, en Zeidung us Berlin, vermeld, met Verwies op en Düsselderdorfer Quell, Engk Januar 1873 singe Dud un liss e Vermöge vun e paar 10.000 Taler op, dat hä för ungerscheedliche wohltätige Organisatione hingerlooße hät. De besser informeete Quelle en Kölle es klor, dat dat en Ent es. Ene Zeidungskreeg öm unse Möler Bock entbrennt.
Versök sich doch dat preußische Berliner Bladd en lokaler kölscher Bericherstattung. Dat Thema schaff et bes en der Fastelovend.

Nor der Möler Bock setz en singem „Landhuus“ en Brauwieler un kann nit engriefe. Wann hä selvs et üvverhaup metkritt. Mer künne uns vürstelle, wie gään hä metgemisch hätt.

Hä stirv tatsächlich am 3. Dezember 1878.

Dä Name „Möler“ Bock weed sich ihter op si Optredde wie op sing Kunsffäädigkeit betrecke. Als Levvenskünsler es hä su geledde, dat de Stadt Kölle im en klein Stroße widmet: et „Möler-Bock-Gässche“ em Vringsveedel.82357974_696606464078000_6093305424646242304_o

Mechel

Wo ist das Maler-Bock-Gäßchen? Hinter diesem Link findet ihr den Artikel, wie alle andere auch am Ort der Handlung: https://findpenguins.com/…/footprint/5ca8cbb1b4a2f3-19516219

Und wie meistens, wenn ich über Kölner Originale schreibe, finde ich kein besseres Buch, als das unvergleichliche Werk von Reinold Louis, „Kölner Originale“, Greven Verlag Köln, ISBN: 3-7743-0241-3

likeheartlaughterwowsadangry
0

Hinterlasse jetzt einen Kommentar

Kommentar verfassen

Diese Website verwendet Akismet, um Spam zu reduzieren. Erfahre mehr darüber, wie deine Kommentardaten verarbeitet werden.