Dat „Ufo“

Em Dezember söke mer jo et Leech, weil et Sönnche sich luuter nor koot blecke lööt. De Dunkelheit nerv mich jedes Johr mih un ich freue mich immer mih, wenn et drusse ens hell es.

Un dobei han ich selver et noch rääch einfach. Ich krige nit wirklich et ärme Dier ov han en dunkle Ecke Angs. Et nerv mich nor un dat nit nor zor Weihnachtszigg, en dä mer uns all üvver bunte Leechter freue un et mem Weihnachtsschmuck widder lossgeiht. Villleich stonn ich och deswäge gään do un luur hin, wann mer en Kölle e bessche jet mem Leech spille. De Unterföhrunge am Bahnhoff för Beispiel, wo mer versök, die Ecke, wo mer Kadangs krige kann, jet fründlicher ze maache un die jo jetz esu vill fotografeet weede.80107450_667820706956576_7803744766952210432_o

Wie ich dis Dag ens widder de Stroß elans „Maria in den Trümmern“ un am Kolumba-Kunsmuseum fahre, sinn ich dat „Ufo“ om Beld widder do hänge un ben tatsächlich et eeschte Mol neugierig, wat dat wall es. Alsu, erunger vum Radd un genau hingeluurt.

Ene Platz, dä hell un fründlich es un dodrüvver dä Metallball. Dä muss jo en Lamp sin. – Es dä och. Am südliche Engk vum Platz dä Satz „Alles kann durch das Licht verändert, deformiert oder eliminiert werden. Es ist genauso geschmeidig wie der Pinsel.“. God, do es för mich klor, dat dat Kuns es. Flöck der Name vun däm Platz opgeschrevve, L.-Fritz-Gruber-Platz, un heim, för nohzelese.

L.Fritz Gruber – et „L.“ steiht för „Leo“ – fingk mer flöck em Netz un e bessche schamme ich mich, dat ich noch nie vun im gehürt hatt. Hä wor ene kölsche Jung, dä 1908 hee gebore es un och hee em Johr 2005 gestorve es. Hä studeet och en Kölle. För Sproche, Philosophie, Kuns, Völkerkunde un noch jet mih interesseet hä sich, es Metbegründer vum „Kölner-“ un „Westdeutscher Kurier“, kritt Brasel met de Nazis un fingk sich en London widder. Vun 1945 an es hä Fotograf för de britische Rheinarmee un bliev däm Metier treu, wie hä 1949 widder noh Kölle trick. Hä es der Gründer vun der „Photokina“ un vun der „Deutschen Gesellschaft für Photographie“! Kei Wunder, dat se däm Kääl ene Platz widme, der jet met Leech ze dun hät. Hät hä doch fass et ganze Levve met Leech „gemolt“. Wie gesaht, irgendwie kann ich et nit gläuve, dat ich dä Kääl nit kannt.78708263_667820753623238_4872748304070344704_o

Zo singem Gedenke, hät mer sich dä Platz geschnapp un im singe Name gegovve. Aale Belder zeige, dat dat fröher ene Schandfleck wor. En hässliche Stell, die för Müll un Jöckemobile god wor un vermodlich su en Eck för Kadangs ze krige, die nit ens ene Name hatt. Dat kunnt jo su nit blieve, weil et Kolumba Kunsmuseum och em Bau wor. Wie hätt dat dann usgesinn, su en Uselseck nevven däm neue Prestige-Objek? 2012 wor dä Platz fäädig.

Jetz fingk mer flöck die Beschreibung, dat dä helle Beton om Platz em Format „sechs zo nüng“ verlaht es, wat enem Kleinbeld-Format entsprich. Met der Lamp dodrüvver weed der eige Schatte selvs e Stöck Kuns, weil et Leech met im spillt un mer Belder „molt“ – esu die Idee. Dat wollt ich usprobeere un kumme widder, wie et dunkel es. Es jo grad nit schwer. Un wat es? Am Aasch e Trötche, ald kapodd, die Lamp.78997720_667820740289906_3370788005752078336_o

Kapodd – un dobei woodt dä Platz grad eesch 2017 mem „Deutschen Landschaftsarchitektur-Preis“ beluhnt. – Sid esu god un dot doch en neu Bier en die Lamp…

Mechel

Das Wochenende ist verregnet, der Glühwein verwässert nur. Schmökert einfach ein wenig hier: https://koelschgaenger.net

Keine Vorstellung davon, wo der Platz ist? In unserem Find-Penguins-Profil findet ihr alle Beiträge auf einer Karte am Ort der Handlung: https://findpenguins.com/…/footprint/5df1ffc44f7ba4-06414569

Bild könnte enthalten: Himmel, Baum, Schuhe und im Freien
likeheartlaughterwowsadangry
0

Hinterlasse jetzt einen Kommentar

Kommentar verfassen

Diese Website verwendet Akismet, um Spam zu reduzieren. Erfahre mehr darüber, wie deine Kommentardaten verarbeitet werden.