Et Dreigesteen

Hügg muss ich ming Wööd ganz vürsichtig setze, denn et es jet passeet, wat nie, ävver och wirklich nie passeere darf – wann mer en Fastelovendsgesellschaff noh aaler Tradition un met Tradition es: e Dreigesteen met ener Frau ov esugar nor met Fraulück ze besetze.

Jetz ze sage, dat et sujet noch nie gov, wör üvverdrevve. Mer muss jo nor jet em Netz söke, för hee un do Frauminsche ganz bovve em Fastelovend ze finge. Kleinere Gesellschafte vun kleinere Öötcher – ehr seht, wie schwer et es, dat esu ze sage, ohne dat ich einem Unrääch dun…

Tatsaach es, dat mer kein Gesellschaff enfällt, die dat gedon hät, die de Größe un de Tradition vun der „KG Ahl Häre von 1927 e.V.“ us Pullem hät. Genau die hät dä Schredd gewag. Et eeschte Dame-Dreigesteen hät zick letzte Samsdag et Regalt: de Prinzin Christina (Christina Weyerstrass), de Bäuerin Bianca (Bianca Sagurna) un de Jungfrau Evarella (Eva Stalitza) han de Gesellschaff üvverzeug. Usgerechent die Gesellschaff, die sich och noch „Ahl Häre“ nennt… Hier findet Ihr sie im Netz: https://ahl-haere.de/damendreigestirn/

Un bevür Ehr jetz schängt, dat dä Kääl nit weiß, dat et „Prinzesin“ heiß: nä, et Stina dräht wirklich der Titel „Prinzin“. Do moot ich schlecke, wie ich dat et eeschte Mol gehürt han. Et es ävver och en Aat, de Emanzipation zo ungerstriche. Ich selvs, wör jo jetz dann och esu wigg gegange, mich „Jungfräuin Evarella“ ze nenne. Oder? – Ävver god, ich kann jo vill verzälle. Löstig es et un e Usrofezeiche allemolde.3

Leich wor dat för die Drei nit, dat kann ich Üch sage. Bei der Proklamation han se e bessche usem Nihkessche verzällt: Em Johr 2010 sage se et eeschte Mol dem Norbert Rohde, dem Präses, dat se Dreigesteen weede wolle. Wat säht do „dä Deck“, dä em Beld ganz links leich ze finge es? „Nur über meine Leiche!“. Ich traue mich an dä Stell, in „dä Deck“ ze nenne, weil de Lück vun der Gesellschaff in op der Bühn och esu nenne – un et klingk leev. Hä schingk der Patriarche-Typ vun Baas ze sin. Ävver mer künnt jo et ärm Dier krige. Ich meine, die Drei sin jo quasi e Levve lang dä Gesellschaff treu, han alle Statione vum Kadettekorps üvver de Danzgrupp bes noh der Gard durchlaufe – un dann säht de Tradition, dat se nie ganz vürre stonn dürfe, wie de Kääls?

Han die Drei der Möp gehat? – Secher dat. Ävver 2011 wore se ald widder beim Norbert Rohde. Do säht hä widder „Nur über meine Leiche!“. Dat säht hä och 2012 un 2013 un 2014 un 2015…

Dann kütt et Johr 2018… Die Hääre, die för et Dreigesteen 2019/20 usgeloot woodte, sage av. Et es ald et Oktoberfess vun dä KG, wie op eimol huhe Nud es. Do sin die Drei esu gewetz, hevve der Ärm un sage, dat die Gesellschaff jo e Dreigestenn hätt, se mööte nor endlich ens „Jo“ sage – un op eimol säht dä Deck och „Jo“. Der Vizepräsisdent Rainer Iven schnapp sich flöck en Fooderkaat, driht se eröm un mäht dodrop ene Vürverdrag – Ungerschreff vum Baas drunger un üvver de soziale Medie gestreut. Zack! – Die Fall hät zogeschnapp!2

Ävver wat heiß „Fall“? Wie die drei Dame am Samsdag op de Bühn em „Dr.-Hans-Köster-Saal“ en Pullem kumme, kumme se eesch gar nit aan. Dä Enzog es skandalös lang un die Freud, dat die Drei et geschaff han un en en paar Minutte Geschichte schrieve, esu usgelooße groß, dat Zigg kein Roll mih spillt. Un wann einer meint, dat do drei Mädcher met Fespelstemm e Bühneprogramm avspule, weil et sich esu gehürt, weiß jo nit, wat mir do erläv han. Dat Dreigesteen es nit nor ganz anders. Nä, et läht ene Optredd hin, dä metrieß, Levvensfreud pur.

Un ich gläuve, der Präses weiß jetz, dat dat en gode Entscheidung wor. Hä es üvver singe Schatte gesprunge un dat es verdammp nit leich bei all dä Kläv-Tradition, die jetz mem Finger op in zeig! Ich meine, hä kann stolz op sich sin un es ald jetz ene unsterbliche Deil vun der Historie.1

Ich hoffe nor, dat mer hee in Kölle nit noch üvver vill Dude klemme müsse, bes esu e Dreigesteen och ens bei uns aankütt.

Mechel

Guckt mal, was für viele neue Möglichkeiten unsere Hausseite bietet: https://koelschgaenger.net/
– toller als Facebook! Ihr könnt jetzt auch dort kommentieren und teilen und das ein oder andere mehr!

Das Damen-Dreigestirn hat auch eine Facebook-Seite: https://www.facebook.com/1-Pulheimer-Damen-Dreigestirn-201920-2295213567193695/

und die mutige KG Ahl Häre hier: https://www.facebook.com/KGAhlHaere/

Das Selfie der Drei habe ich mir mit freundlicher Genehmingung der Prinzin hier von Facebook gemopst. Für die anderen Fotos musste mein Handy ran.

likeheartlaughterwowsadangry
0

Hinterlasse jetzt einen Kommentar

Kommentar verfassen

Diese Website verwendet Akismet, um Spam zu reduzieren. Erfahre mehr darüber, wie deine Kommentardaten verarbeitet werden.