Et Hätz schleiht em Veedel

Su, su, nohdäm klor es, dat uns Sproch Heimat es, halde mer no fass „Et Hätz schleiht em Veedel“. De Welt stundt am Mondag jo Kopp, weil de neu Fastelovendssession aangefange hät. „Do laachs do dich kapodd!“ – wat en Freud.

Ävver et Motto klingk, wann ich mer aanluure, wat esu op de Stroße loss es, jo ald e bessche noh enem verzwiefelte Hilferrof. E Großaufgebodd an Polizei marscheet op, ald Dage vürher süht mer Avsperrunge, Drängelgitter, Klowage un Pissoirs üvverall. De Veedele sind jo voll vun junge Lück, die „Drinks do eine met?“ mih levve, wie dat se dat fählerfrei schrieve künne. Die andere Sigg denk „Wat soll dä Quatsch?“, dat hät doch nix mem Fastelovend ze dun! Die notze uns Brauchtum, för sich sennloss ze besuffe un am Engk litt hee alles en Schutt und Äsch. Wo es do et Veedel?

Un üvverhaup, unse Fastelovend op der Stroß, do gild „Maach et god ävver nit ze off“. Se kumme mem Vollruusch am 11.11. jo grad usem „Jeck em Sonnesching“. Die Jugend hüggzedags, üvverdriev de Fiererei bes der Aaz kütt. Fastelovend op der Stroß es nor eimol em Johr vun Wievefastelovend bes Veilchensdinsdag un nor do trick mer met der decke Trumm durch et Veedel. Esu es dat un anders darf et och nit sin. Fäädig. Us.

Ävver „Wat wells do maache?“. Nötz uns dat „Kenne mer nit, bruche mer nit, fott domet“ irgendjet? Ich gläuve nit. Un wann mer ihrlich sin, mir all, die dat hee lese, sin mir doch die, die der 11.11. esu groß gemaht han. Ov kann sich hee einer entsenne, wie do am 11.11. e klei Schmölzche sich vergnög om Ostermann-Platz op er Fastelovend gefreut hät? Mir sin doch die „Generation Alder Maat“. Mir wore doch de Eeschte, die us der klein Tradition usgebroche sin un der 11.11. en de Welt erusgedrage han. Do zeig doch de „Ostermann-Generation“ mem Finger jetz op uns. Ävver sin mer dann schläächte Minsche un halde der Fastelovend nit en Ihre? Enä, mer han en leev un fiere kräftig – esu wie mer künne, jeder noh singer Fazung.

„Et bliev nix, wie et wor“ un dat ald zick 2000 Johr. Veränderung es Levve un wat läv besteiht fott. Et es doch esu! Wat wör, wann die Jugend sage dät, der Fastelovend wör ehr zo langwielig un dät fott blieve? Dat wör doch eesch rääch Dress! Un genau dat passeet jo grad nit.

„Wat fott es, es fott“ stemmp jo och nicht immer ganz. Wat mer ihrlich leid deit, es dat der Zinter Määtes en däm Trubel keine Platz mih fingk. Dat hät jo lange Zigg nevvenenein funktioneet. Ävver jetz der Mantel deile un mem Pääd durch de Stroße trecke, es villleich e bessche gefährlich. Mäht jo kaum och noch einer. Ävver „et hät noch immer god gegange“ – och för in. Der Zinter Määtes sök sich singe Platz öm der Namensdag eröm – un fingk en do jo och. Hä es nit „fott“, sondern „woanders“. Dat säht jo och off ene Frauminsch för singe Partner, wann et sich widder ens neu Schohn gekauf hät: „De Nüsele sin nit fott, se sin nor woanders.“. Nor et Singe es irgendwie fott. Ävver dat litt no nit am Fastelovend!

„Et kütt, wie et kütt.“ Die klein Ohnmaach, die hinger däm Sätzche stich, die es doch normal. Wä weiß dat nit? Mir Kölsche doch suwiesu. Ävver irgendwie wünsche ich mer, dat ich noch metkrige, wie die, die jetz der Radau maache, sich wundere, wie de nöchste Generation „ehre“ Fastelovend verändert. Dann weede ich stillvergnög grinse – ävver ganz fett.

„Et es jo, wie et es.“ Et gitt Gesetze, die gelde einfach immer. Loot uns nit schänge, sondern laache, schunkele, bütze un e Kölsch drinke – en unsem Veedel, wo et Hätz schleiht.

Mechel

likeheartlaughterwowsadangry
0

Hinterlasse jetzt einen Kommentar

Kommentar verfassen

Diese Website verwendet Akismet, um Spam zu reduzieren. Erfahre mehr darüber, wie deine Kommentardaten verarbeitet werden.