Kwartier Latäng

Wedde, ich sage ene Begreff un en ganze Rötsch weed de Nas rümpe? „Kwartier Latäng“ – Ich sage. „ävver schön es et doch“.

Ich gläuve, et einzige wodrüvver mer nit strigg es, wo et Wöödche „Kwartier Latäng“ herkütt. Mer han hee einfach der Name vum Pariser Studenteveedel „Quartier Latin“ einfach en et Kölsche üvvernomme un nor winnige bruche die Hilfestellung „Neustadt Süd beim Zülpicher Platz“.

Der ein ov andere folg bestemmp der Sigg „koeln.de“. Die grenz et Kwartier Latäng op et Gebiet Zülpicher Stroß, Moselstroß, Luxemburger Stroß un Hohenstaufering en. Unbestredde, hee sin de mieste Weetschafte un de Anarchie op der Stroß am Ovend am größte. Dat finge ich ävver jet koot gegreffe. Ävver vun vürre:

Dat Veedel es rääch jung em Verhäldnis zo der Historie vun Kölle: Bes 1880 sin hee e paar Wäge, Wiese un sumfiges Land. Kölle reck zo dä Zigg hee jo grad ens bes nohm Hohenstaufering, hinger däm die Stadtmuur usem Meddelalder huhwähß. Dat Terrain litt tirektemang em Schossfeld, esu dat et hee keine fasste Baute gevve darf. Em Johr 1881 triff mer en andere Entscheidung. Kölle muss endlich üvver die Muur erus wahße, bruch wäge der Industrialisierung Platz. Die Muur weed geschleif un de Stadt en däm Gebiet usgebaut.

Et Gebiet öm der hüggige Rathenauplatz litt ävver en en Senk un es sumfig. Domet mer et nit met vill Opwand opschödde muss, plant mer hee zenöchs ene große Park. Wonnunge well mer nor em Carré vun der hüggige Roon-, Mozaat-, Beethove- un Engelbäästroß baue. Ene Park widderöm weed jetz deswäge zo düür, weil de Besetzer vun de Grundstücke verstonn, dat die op eins jet wäät sin un de Priese drieve. Der Stadtbaumeister Stübben plant doher öm. Die große Parkaanlag, unse Volksgaade, ensteiht wigger südlich un et neue Veedel kritt „nor“ ene große Fessplatz, dä och för Volksversammlunge, et Opstelle vun Truppe un och för der Karnevalszog god es. Dä Platz es üvvrigens jet größer wie der Nüümaat.

Gedäuf weed hä „Königsplatz“, för dä Künning Friedrich Wilhelm IV. ze ihre. Domet wolle se singe Verdeens öm de Fäädigstellung vum Kölner Dom aanerkenne. Natörlich weed unger de Parteie heiß diskuteet, dat dat no jet nööchter es, in nor „Königsplatz“ ze däufe. Ävver am Engk seege die, die jet praktischer veraanlag sin, dä Name kann mer sich einfach god merke.

Wann mer jetz weiß, dat dä Platz nor 42.000 Reichsmark koste darf – dat es nit ens en Zehntel vun de Koste vum Volkspark – un de Nohberschaff vum Veedel hinger der Roonstroß, dat koot vürher enstande es, sich luuter üvver der Möff vun der Messkuhl beschwert, weiß mer och, dat hee villleich jet halvhätzig en Lösung geschaffe weed.
Ävver selvs de Parkaanlag hilf nit gäge der Möff. De Avwässer vun de Heinsbergstroß lande en ener Kuhl vum Park… . Eesch wie 1899 de Synagog an der Roonstroß gebaut weed, weed et besser öm et Aansinn vun däm Platz. Dä Platz es jetz e Schmuckstöck, ävver düster, zo winnig Leech, wie de Lück sage. Ich gläuve, do hät sich nit vill geändert.

Och der Name weed der politische Situation aangepass. 1923 weed hä noh däm jüdische Demokrat Walther Rathenau benannt, dä 1922 ömgebraht woodt. En de 20’er Johre es et dann ävver och widder met der Schmuckstöck-Zigg vörbei. För et Arbeidsamp weed hee en Barack gebaut, för die ville Arbeidslose verwalte ze künne. Nor för schön ze sin, wor hä jo nit gedaach.

1933 es der Name „Rathenauplatz“ Vergangeheit. För zwölf Johr es et der „Horst-Wessels-Platz“. Hä wor SA-Föhrer un hät mem „Horst-Wessels-Leed“ en zweite Nationalhymne geschaffe, bevür hä em Johr 1930, wie hä 23 Johr ald wor, erschosse weed. – Tirek nohm Kreeg es et widder der Rathenauplatz.

Interessant es, wat nohm Kreeg passeet un wall et Kwartier Latäng möglich mäht: Nohm Bombekreeg sin hee vill Wonnunge noch ze bruche. De Stadt Kölle konzentreet sich doher vür allem op die Veedel, die stärker betroffe sin. Et Kwartier Latäng interesseet zonöchs nit. En der Folg weede de Wonnverhäldnisse schläächter un Minsche trecke en, die belligere Wonnunge ov Zemmere nüdig han. Zor gliche Zigg weed jo de Universität, die öm de Eck litt, widder hergereech un se hät immer mih Studente.

Usem Veedel weed esu ene bunte Villvölkermix, met Minsche, die off nor koote Zigg hee wonne un winnig Senn för ehr Umgebung han. Dat es doch klor. E Geföhl för et Veedel kann doch esu gar nit opkumme. Ävver selvsverständlich mööchte die Kootzigg-Kölsche och soziale Kontakte un treffe sich en de Weetschafte öm de Eck, vun denne et immer mih gitt. Kunnt et anders kumme, wie dat do en Partymeil ensteiht?

Natörlich gitt et och die Urkölsche em Veedel, wie jo en jedem andere Veedel och. Denne es et Veedel selvsverständlich nit egal. Vür kootem stundte om Rathenauplatz noch Container för Flüchlinge. Dä ganze Platz wirkte verkumme un der Geroch erennerte an singe Aanfang. Wann mer hügg luurt, wie dä Platz ussüht, met Klos, enem Café, tirek donevve Spillmöglichkeite för Pänz un enem kleine Bolzplatz em Käfig, ener Freillauffläch för Hüngcher un enem Böcherschaaf, zeige de Minsche en der Bürgergemeinschaff Rathenauplatz e.V. doch endrocksvoll, wäm dat Veedel gehürt, wä hee zohus es un beede de Integration aan. Dat Veedel nor op dat Gebiet, dat en „koeln.de“ genannt weed un dä Gedanke ze beschränke, es mir zo winnig.

Ach, un am Engk, wie ich met 22, als junge Kääl op die Rhingsigg trecke, ben ich jo och en ener 18-Quadratmeter-Bud am Hohestaufering aangekumme un gehüre jo och bei evve denne, die met zwei Johr nor koot geblevve sin.

Mich trick et öfters ovends noch heehin. Ävver och dagsüvver, weil et hee och dat ein ov andere Geschäff gitt un weil et jo och schön es, dat Veedel, dat bei der Stadt nit esu huh em Kurs steiht, de Minsche ävver doför sorge, dat et mih es wie Kwartier Latäng.

Mechel


Und hier findet ihr die Artikel am Ort des Geschehens: https://findpenguins.com/koelschgaenger

Wer wissen möchte, was die Bürger am Rathenauplatz so alles bewerkstelligen, der findet hier eine erste Anlaufstelle: https://rathenauplatz.de/

Die historischen Informationen zum Platz habe ich vor allem dem schönen Buch „Mer als nur Kwartier Latäng“ von Anne Sass, erschienen im Bachem Verlag unter ISBN 3-7616-1133-1 entnommen.

likeheartlaughterwowsadangry
0

Hinterlasse jetzt einen Kommentar

Kommentar verfassen

Diese Website verwendet Akismet, um Spam zu reduzieren. Erfahre mehr darüber, wie deine Kommentardaten verarbeitet werden.