Overstolzehuus

Overstolzehuus, Dir han mer och jet aangedon. Do steihs en der Rhinggass, spack gedrängk zwesche losslosse Zweckbaute vun der Nohkreegszigg, ov ze wonne oder e winnig Gewerv. Ding Gägeüvver wend Der gar der Fott zo un – met Verläuv – besser rüch et an der Stell miets och nit.De beste Chance, Der gewahr ze weede, hät mer, wann mer, wie ich zoletz, iher zofällig vum Heumaat durch et klei „Börsegässche“, dat nevven der „Malzmüll“ op Dich zogeiht.
Wie selde staats Do do steihs. God, Do häs jo och Ding Historie. Der Name säht et ald: dat Patriziergeschlääch vun de Overstolze well ene würdige, romanische Bau en däm se wonne un wirke künne, der se ald em Sching üvver allemolde stallt. Em Johr 1230 bes Do fäädig.

Em Parterre schaff de Famillich un emfängk die Mächtige un Geschäffslück. Et eeschte Geschoss es noch gasslicher, met enem große Saal för de gesellschaffliche Nüdigkeite. Die veer Etage drüvver, die vum wunderbare Stufegivvel gezeet weede, sin ald för et Warelager vürbehalde. Wat för en Fläch!

Mer meint jo, dat esu en rich Famillich an esu enem Bau fasshalde deit. Ävver nä, ald ein Johrhundert hingerdren, 1337, käuf et Patriziergeschlääch vun de Hardefusts Dich, nor öm Dich noh fass glicher Zigg widder ze verkaufe. Esu beeds Do üvver de Johrhunderte vill Famillije en Herberg. Nor eine Besetzer mööch Dich em Johr 1794 ad leevs enrieße. Der finge Huushäär setz sich ävver av, wie der Napoleon vörbei kütt. Wat e Glöck!

Et sin nit dinge beste Johr. Em Johr 1838 käuf Dich de Stadt Kölle, nohdem Dinge neue Besetzer ald widder an der Avriss denk. Se investiere en en Renoveerung un schaffe su Plaatz för de „Industrie un Handelskammer“ un de Börse. Aha!
Doher kütt der Name vun däm klei Gässche, dat noh Dir föht.

Natörlich, der Kreeg mäht alles glich – kapott. So zwingk hä Dich 1942 och en de Knee. Der Rod häld an der fass. Hä weiß öm de Schatz un baut Dich opwändig widder op. Jetz es de Kunshuhschull för Medie“ Dinge Gass.

Un esu steihs Do, dat äldeste Patrizierhuus vun der Stadt Kölle, dat erhalde es, bes en die Dag staats en enem Ömfeld, dat lang net esu vörnähm es. Ald wann mer versögk, Dich en et Beld ze banne, muss mer, klein, wie mer es, noh Dir opschaue, nor för fasszestalle, dat mer Dich nie ganz drop kritt, wie Do Dich esu stolz nohm Himmel recks.

Ävver am Engk es dat jo ald 1230 die Avsich – Overstolz evvens.

Mechel

likeheartlaughterwowsadangry
0

Hinterlasse jetzt einen Kommentar

Kommentar verfassen

Diese Website verwendet Akismet, um Spam zu reduzieren. Erfahre mehr darüber, wie deine Kommentardaten verarbeitet werden.