Abtei Brauwieler

Sommersonnesonnesching – klor Leech, wärm Luff, Bewägungsdrang, av op et Räddche.De Melodie vum Meiers Kättche em Kopp radele ich stellvergnög durch et Ömland em Weste. Zwor ben ich nie ganz allein, off brause Jöckemobile de Landstroß lans, ävver de Landstroße weede vun Raddwäge gesüümp un esu durch de Felder ze fahre un ze sinn, wo uns Koon wähß, de leichte Bris, die üvver de Ähre strich ze spöre, Buurehüüscher un klein Öötcher ens widder ze entdecke – do kann ich bei entspanne.

E klein Knipp gitt et – ungeloge. De Melodie vum Meiers Kättche es koot nit mih esu schwungvoll em Kopp, geiht iher en e verbesse Stakkato üvver, wie ich och ald op der Spetz vum Hüvvel ben un fassstelle, dat ich „irgendwo“ aangekumme ben: de Abtei Brauwieler.

Öm de vörletzte Johrtausenwend scheck et sich för Adelige, ehr Penunse för Kirche un Klüster ze stefte. Der Falzgraf Ezzo-Ehrenfried lenk em Johr 1024 de Geschecke, esu dat hä „sing“ Kluster op singem Land am wichtige Wäg noh Ooche un Roermond baue kann.

Benediktiner arbeide un bedde hee baal 800 Johr, schaffe Wääte. Bes der Napoleon kütt un 1802 met der Säkularisation et Kluster ophivv. De Abteikirch es jetz en Farrkirch. Esu vill gesteiht hä de Kathollicke zo.

Bei der Klusteraanlag fällt de Franzuse 1811 en, dat mer hee god ärm Lück ungerbränge kann – de ärm Lück vun Kölle.
Koot drop kome de Preuße. Ganz preußisch dun se de – sage mer ens – Verwahraanstalt, en en Arbeidaanstalt verändere. Dat es eigentlich datselve, nor mehr kütt mih en et Schweißte. Natörlich finge sich hee och de Ärme widder – die vun Kölle.

Ein Johrhundert späder weed mer hee konkreter. Dat fröhere Kluster weed ene „Zellebau“ för de Justiz – de Justiz vun Kölle.

1933, der Deefpunk, es de aldihrwürdige Abtei koot e Konzentrationslager – för Jüdde us Kölle.

Donoh fingk sich 1944 sugar der Konrad Adenauer hee widder, hä es ene Häffling vun der Gestapo. Et es widder en Haffanstalt – för de Gestapo vun Kölle.

1954 bes 1978 notz der Landschaffsverband Rheinland (LVR) dat Kluster för psychisch Kranke un Avhängige ze behandele. – De Malade vun Kölle.

Irgendwie düster, dat all. Mer kütt dat Wood „avschiebe“ en der Senn.

Hügg es de Notzung schöner: haupsächlich en Archiv un et Amp för Denkmolfläg vum LVR es hee dren – och för de Denkmöler vun Kölle.

Un wann ich hügg esu bei leechtem Sonnesching op der Bank em geflägte Gaade vun däm aale Kluster setze, noh Oste en Richtung Kölle luure, kütt en mir en Frog op: Es dat hee nit och e Stöckelche Kölle?

En dä Weetschafte en mingen Rögge hingerm Kluster geiht et och noh bester kölscher Tradition zo: et gitt jet ze müffele un ze süffele.

Faht ens mem Räddche hin.

Mechel

Hinterlasse jetzt einen Kommentar

Kommentar verfassen

Diese Website verwendet Akismet, um Spam zu reduzieren. Erfahre mehr darüber, wie deine Kommentardaten verarbeitet werden.