Sankt Maria Ablass

Op kölsch gesaht

Ich denke zick Dage drüvver noh, wodrüvver et sich god zo Pooschte schrieve lööt. Jet, dat nit op jeder Sigg ze finge es. Dat es mänchmol nit ganz einfach. Do kütt mer ene Zofall zo Hölp, ene Klaaf met ener Kollegin.

Dä Klaaf fängk etwa esu aan: „Ich ben am Sonndag met mingem Kääl spazeere gegange. Mer beege su öm en Eck, weiß do, zwesche dä neu Baute us de 50’er, hingen am Börseplatz un stonn op eimol vür ener schnuckelige, klein Kirch. Han ich noch nie gesinn…“.

Flöck es geklärt, dat wirklich nit der Bau vum Priesterseminar gemeint es, dä jo wall keiner „schnuckelig“ un „klein“ nenne dät. En Idee han ich zo däm Ziggpunk ävver och nit, alsu Fottoapparat engestoche un nohgeluurt.

Dä kleine Bau weed der ein ov andere kenne, wann ich ene Name sage: Zint Maria Avlass. Die klein Kapell wirk tatsächlich verstoche, esu zwesche all dä huhe Baute. Mer hät ävver freie Zogang. En Zeugin us en andere Zigg.

An dä Stell stundt ens en große Basilika, die dreischeffig wor, met däm Name „Zint Maria Avlass“. Se woodt em Johr 927 et eeschte Mol erwähnt un wor die Kirch, die bei der Damesteff Zint Ooschel gehürte. De Nonne han en ehr gebedt. Wie dann die Franzuse en Kölle et Regalt hatte, woodt der Steff Zint Ooschel opgelüs un de Basilika em Johr 1808 niddergelaht. Mer kann och ganz unromantisch „avgeresse“ sage, weil die Kirch Zint Ooschel Farrkirch woodt un Zint Maria Avlass evvens nit.

Stonn geblevve es ävver dat klein Marie-Kapellche, dat bei de Basilika gehürte un zick 1527 belaht es. Et woodt gebaut, öm et Marie-Fresko zo schötze, dat vürher an der Ussewand vun Zint Maria Avlass wor.

Hüggzedags es et de „Hll.-Konstatin un Helena Kirch“ vun der Gemeinde vun de russisch—othodoxe Chreste. Se weed genötz un steiht offe. Fottos vum jet düstere, ävver wunderschöne Enneraum han ich ävver nit. Wie ich die Kirch betrodde han, wore grad drei Fraue et Singe am Probe. Ich föhlte mich fründlich emfange, wollt ävver nit stüre. Woröm och? Goht selvs ens spinkse.

Un wat hät dat jetz met Pooschte ze dun? No, em Meddelalder gov et en Goddesdraach am Palmsonndag, dä jo letzte Woch wor. En Zint Gereon fung de Palmweih an däm Sonndag statt. Dodrop bewägte sich die Goddesdraach nohm Dom, wo et Huhamp stattfung. Zweschedurch heeldt se ävver en Zint Maria Avlass. Do woodt geprädig un de Lück us der Gemeinde erheeldte evvens ene Avlass. Natörlich die, die bei der Goddesdraach metgemaht han. Inne woodte alsu de Sünde vergovve, die se grad neu hatte. Dat ging nit nor üvver de Avlassbreefe, die all su aanröchig finge. Un dat Kreppche, finge ich, kann mer och en Woch späder god verzälle.

Mer wünsche Üch e fruh Pooschfess!

Mechel

likeheartlaughterwowsadangry
0

Hinterlasse jetzt einen Kommentar

Kommentar verfassen

Diese Website verwendet Akismet, um Spam zu reduzieren. Erfahre mehr darüber, wie deine Kommentardaten verarbeitet werden.