Letz Wochenengk

– mir Kölschgänger treffe uns noh Monate ens widder för zesamme e Gängelche ze maache. Stundelang gonn mer durch Kölle un sin op der Jag noh Aansichte.Selvsverständlich steiht der Dom om Programm. Sid neugierig, wat et Ramona do widder all gefunge hät! Wann dä nit zweschedurch ens zomaache dät, dät et do nit mih eruskumme! En Föhrung üvver de Däächer maache mer och. Nit ze gläuve, wie schön! – un jet möhsam.

Ech möhsam weed et ävver eesch donoh. Krütz un quer durch de Stadt, Gebäude, Fassade-Details, Pötze sin op Belder veriewig. Nor bei de Parkaanlage halde mer uns zoröck. Em Momang, vür allem bei däm dreckelige Wedder vum letzte Wochenengk, sin se jo och nit esu nett aanzesinn. Et Auge liss jo met – och, deit et jo immer, bei uns, die mer sinn künne.

Jetz es et ävver späd en der Woch un de Zigg för Samsdag jet koot. För ene richtige „Beidrag“ reck de Zigg nit. Ävver e klei Rödsel han ich widder gefunge:

An einer Stell beege mer öm en Eck un stonn vör däm klei Hüüsche. Mer wundere uns. Wat es dat?  Ich gonn drömeröm: fass e Quadrat. An der Pooz prangk uns kölsch Wappe. Es et ene Bau vun der Stadt? Es es zo un kein Tafel met enem Hinwies ze finge.

Wat es dat üvverhaup för ene Stil? Ich han jo keine Kenn vun Kuns. Ich meine ävver, en Pariss hät mer einer zo enem ähnliche Bau gesaht, dat wör Neo-Renaissance. Alsu wall av dem Johr 1830, de Preuße-Zigg en Kölle. Ävver et steiht tirek bei… …Zint Zillie, an der Eck Cäcilien Stroß noh der Neuköllner Stroß. Vun drei Sigge es et ömgevve vum Glasbau vun der BNP Paribas-Bank. Deswäge fahre däglich zehndausende Minsche an däm Hüüsche vörbei un han et em Levve noch nit gesinn. Et es jo nit ens en der Kaat engezeichent, wie wann et e Gaadehüüsche wör!

En minge Böcher finge ich dozo nix. Em Netz ävver ene Hinwies: Kapell vun Zint Zillie. En Kapell mem kölsche Stadtwappe, die op en en ganz ander Wies gebaut es, wie die romanische Kirch, bei die se gehüre soll?

Jetz mööte mer et fuusdeck hinger de Uhre han ov einer finge, dä uns Kölschgänger un uns Kölsche us der Bredouille hilf. Dat Rödsel well doch gelüs weede!

Mechel