Et Bettenhuus

Wat ene Klotz. Ich gevve zo, aanfangs hät hä mich avgestosse. Ävver och e bessche faszineet un dann widder avgestosse. Wichtig es hä jo, erschleiht ävver Lindenthal jet.

Et Bettenhuus vun der Uni-Klinik es immerhin 70 Meter huh un hät 18 Etage. De Hüüscher drömeröm, alsu die kenne ich en Ling normalerwies met hühstens vier Etage. Künnt Ehr Üch vürstelle, wie dä Kaventsmann do us däm Veedel erusrag?

Villleich kann mer sugar sage, dat hä aangemesse erusrag. „Universitäts-Klinik“ bedügg jo och, dat hee geforsch un geleht weed. Em Kään föht dat sugar op et Johr 1248 zoröck. E wichtig Johr för Kölle. Et es jo et Johr, en däm der Grundstein vum Dom gelaht woode es. Ävver och der Albertus Magnus hät en däm Johr aangefange, em Opdrag vun de Dominikaner-Mönche ze lihre. Nevve Philosophie, Theologie un Rääch evvens och Millizing – der Aanfang vun unser Universität. Zick däm Johr weed en Kölle Millizing en der Aat un Wies vun ener Universität met Ungerbrechunge geleht.

De Klinike selvs, läge ehre Aanfang en et Johr 1871. De Stadt Kölle käuf en däm Johr de „Heilanstalt für Gemüths- un Nervenkranke des A.J. Maasen auf der Lindenburg bei Köln“. Der Begreff „Lindenburg“ geiht dobei op e Landgod zoröck, dat dem Antoniter-Orde gehürte un zwesche Bachemer- un Gleueler Stroß log. Längs vergesse, ävver der Name „Lindenburg“ häld sich su selvsverständlich, dat de Kölner Verkehrsbetriebe (KVB) bes hügg nor de Haltestell „Lindenburg“ kennt un die met däm Zosatz „Universitätskliniken“ ergänz hät. Versök ens einem ze verklöre, dä der Wäg nit kennt, villleich esugar op Englisch, wo hä hin muss, wann et dä Zosatz nit göv. Oder?

Em Johr 1908, alsu vör 111 Johre, weed dat Terrain zom Großspidol usgebaut. Et hät domols ald 1108 Bedder. Av dem Johr 1919 weed Mellizing hee geleht. Em Johr 1953, wie die Universität zo Kölle vum Land NRW gedrage weed, wähßelt och et städtische Krankehuus Lindenburg als Universitätsspidol nohm Land.

Em Johr 1964 gewennt dann et Architekturbürro Heinle un Wischer us Stuttgart der Wettbewerv mem Entworf för et Bettenhuus. Dat weed em Johr 1972 fäädigestallt un süht zo dä Zigg vill filigraner us, wir dä glatte Koloss us Glas. – Dat Wood meine ich nit schlääch, ävver de aale Kölsche weede wesse, wat ich meine. Dä aale Bau hatt Balkone, die mer god erkenne kunnt, wat däm Bau wirklich en fründlichere Struktur gov. Die Fassad us Glas gitt et eesch zick der Saneerung, die em Johr 2012 fäädig wor – un nit immer steiht dä Brocke esu schön em Sonneleech.

Ävver egal. De Funktion es wichtig för de Minsche en Kölle. En ca. 1500 Bedder weede em Johr ca. die 63.000 Patiente behandelt. Dat zällt, finge ich. Do es de Eleganz irgendwie Nevvesaach.

Ovends en de Weetschafte, do kann mer sich üvvrigens secher sin, dat eine vun dä baal 11.000 Aangestellte, miets sugar ene Aaz un en paar Krankeschwestere tirek öm dich eröm sin. Dat es doch god, wann der Fesch schlääch es! Der ein ov andere Patient, dä et noh der Operation noh nem fresche Kölsch driev, fingk mer hee natörlich dann och rägelmäßig un weed jet beduurt.

Wä stürt do dä Radau vum Rettungshubschrauber? Mich nit.

Mechel