Das „Krieler Dömchen“

Zinter Stephanus – „Krieler Dömche“ nenne mer Dich. Wann ich dich su aanluure, ahne ich nit, wat do durchläv häs. Do steihs do em Dreieck, dat Gleueler- un Zülpicher Stroß belde un der Verkehr flüüß ihter an dir vörbei, wie noh dir hin. Flöck bes do üvversinn.

Zogegovve, di Levve es nit esu oprägend wie dat vun der Huhe Domkirch zo Kölle un ohne in wörs do och nit als „Krieler Dömche“ bekannt. Mih Buur wie Adel, romanisch schlich, nit gotisch staats bes do die Kirch vun ener üvver Johrhunderte kleine Gemeinde. Ävver dä „Titel“ „Dömche“ hät ald singe Grund.

Erwahße bes do vermodlich ganz profan us ener römische Ziegelei. Et mag och en Wonnhuus gewäse sin, dat ding äldste Fundamente livvert. Römisch jedefalls. Suvill es gewess.

Baal mööchte de Buure, die öm dich eröm Felder bestelle, ööntlich bedde künne, baue sich en klein, hölzer Kapell. Ene Pastur prädig. Hildebold es singe Name.

An enem wärme Fröhjohrsdag em späde 8. Johrhundert verläuf sich ene Fremde bei dich. Hä es als Jäger aangetrocke. Et es der Künning Karl – hingerdren weed hä Kaiser Karl „der Große“ genannt. Hä ligg an Geech un es för en Kur en Oocche, wie der Bischoff Rikolph en Kölle stirv. En Kölle es der Düüvel loss weil ene Nohfolger gesök weed. Der Künning Karl mäht sich op der Wäg, för selver ene Nohfolger vum Bischoff Rikolph ze bestemme. Ohne et aanzekündige reis hä durch de deechte Wälder noh Kölle. Keiner erkennt en en singem Gewand als Jäger. Der Pastur Hildebold reck däm Mann, dä ganz beet es, wie selvsverständlich ene Schlupp Wasser un wiggerhin unerkannt folg der Karl der Mess. Als Dank doför, esu fründlich opgenomme woode zo sin, mööch hä en Goldmünz gevve. Der Hildebold lähnt dat av. Et wör zo vill för su en klein Gemeinde. Wann der Jäger wirklich rich schenke mööch, dät der Hildebold för Ledder vun enem Rih för ene neue Endband för die aal, avgegreffe Bibel froge.

Avgestüsse vum huffäädige Zänk vun de Kölsche, die sich nit op ene neue Bischoff einige künne, freut hä sich üvver die bedaachte Bescheideheit. Der Kaiser Karl hät singe neue Bischoff för Kölle gefunge! Der Hildebold steig späder zom eeschte Ääzbischoff vun Kölle op.

Un weil ene Bischoff en enem Dom setz, bes do zickdäm et Dömche vun Kriel.

Koot drop, öm et Johr 900, es nit nor di Fundament us Stein. Enä, dinger Gemeinde kanns do jetz secher Obdach beede.
Mess öm Mess weed üvver Johrhunderte en dir gelese. Pänz weede gedäuf, Paare hierode, Minsche weede beigesatz, Johrunderte lang. Et Hofgod Kriel, dat tirek aangrenz, jetz längs verfalle, es üvver Johrhunderte och der Gereechsoot för de ömligende Buure Höff. Wat heiß et Hoffgod? Dat Gereech hät mer dir kooterhand aangehange. Vier schwere Konsole, die us dinger südliche Wand rage, zeuge bes hügg vun dinger profane Lass. De Arbeid bliev an dir hänge – dat jetz ald 1.100 Johr. Mindestens.

God, nohm Kreeg wees do zo klein. Nä, ding Größe hät sich jo nit verändert. De Minsche woodte zo vill. Zint Albertus Magnus nevvenaan hät et Alldagsgeschäff üvvernomme. Dir bliev av un an et Besondere, en schön Huhhzigg, för e Beispill.

Der deechte Wald hät mer dir em Johr 1474 genomme. Avgeholz, domet keine Feind Deckung fingk. Ävver die, die en dingem Schatte verwiele, villleich unger wärmer Sonn e Schlüppche Wasser drinke, entsenne sich an di Kreppche.

 

Mechel